ត្រដក់តូចជាសត្វកំពុងទទួលរងការគំរាមកំហែងលើពិភពលោក និងកំពុងមានវត្តមាននៅកម្ពុជា
ភ្នំពេញ៖ សត្វត្រដក់តូច – Lesser Adjutant៖ មានឈ្មោះវិទ្យាសាស្ត្រ Leptoptilos javanicus និងវាស្ថិតនៅក្នុងប្រភេទសត្វកម្រ និងកំពុងទទួលការគំរាមកំហែងនៅលើពិភពលោកផងដែរ។
ទំព័រហ្វេសប៊ុករបស់ក្រសួងបរិស្ថាននៅថ្ងៃទី ៣០ ខែមីនា ឆ្នាំ ២០២៣បា ឱ្យដឹងថា ត្រដក់តូចជាប្រភេទសត្វកំពុងទទួលរងការគំរាមកំហែង (VU) លើពិភពលោក និងស្ថិតក្នុងបញ្ជីក្រហម របស់អង្គការIUCN ។វាមានវត្តមានពេញ មួយឆ្នាំនៅប្រទេសកម្ពុជា។
សត្វប្រភេទនេះច្រើន រស់នៅតាមតំបន់ដីសើម តាមវាលទំនាប តំបន់ដីសើមនៅក្នុងព្រៃល្បោះ ទន្លធំៗ និងនៅតាមតំបន់ព្រៃលិចទឹក នៃប្រទេសកម្ពុជា មានបន្ទាយពងកូនដ៏ធំនៅក្នុងតំបន់រាមសារព្រៃទាល់ នៃបឹងទន្លេសាប និងមួយចំនួនទៀតមានបន្ទាយពងកូននៅភូមិភាគខាងជើងនៃប្រទេស។
ត្រដក់តូចជាទូទៅវាមាន មាឌធំ មានចំពុះធំពណ៌ស្រអាប់ ក្បាលត្រងោលពណ៌ផ្កាឈូក កពណ៌លឿងស្រាល ផ្នែកខាងលើ និង ស្លាបពណ៌ខ្មៅ ផ្នែកខាងក្រោមពណ៌ស។ មួយចំនួនដែលនៅបឹងទន្លេសាបធ្វើការបន្តពូជនៅដើមរដូវប្រាំង ផ្ទុយពីមួយចំនួនដែលនៅភូមិភាគទំនាបខាងជើងធ្វើការបន្តពូជនៅដើមរដូវរស្សា៕ដោយ៖ម៉ាដេប៉ូ