វ៉ាសូវី ប្រធានាធិបតីប្រទេសអ៊ុយក្រែន លោក Zelensky ប្តេជ្ញាថា “គ្មានព្រំដែន” រវាងអ៊ុយក្រែននិងប៉ូឡូញ។ មេដឹកនាំអ៊ុយក្រែនបានសន្យាបែបនេះ ក្នុងដំណើរទស្សនកិច្ចទៅកាន់ទីក្រុង វ៉ាសូវី (Warsaw) ខណៈដែលលោកបានសាទរចំពោះការគាំទ្ររបស់ប៉ូឡូញ នៅក្នុងជម្លោះជាមួយទីក្រុងម៉ូស្គូ។

ប្រធានាធិបតីអ៊ុយក្រែន លោក Volodymyr Zelensky បានជួបសមភាគីប៉ូឡូញ លោក អែនត្រេ ឌូដា (Andrzej Duda) នៅក្រុង Warsaw កាលពីថ្ងៃពុធ សប្តាហ៍នេះ ជាទស្សនកិច្ចផ្លូវការលើកដំបូងរបស់លោកទៅកាន់ប្រទេសប៉ូឡូញ ចាប់តាំងពីការចាប់ផ្តើមនៃអរិភាពរវាងរុស្ស៊ី និងអ៊ុយក្រែនក្នុងខែកុម្ភៈ ឆ្នាំ២០២២។

លោក Zelensky បានថ្លែងក្នុងអំឡុងពេលនៃកិច្ចប្រជុំ ដោយសន្យាថា “អ្នកបានឈរស្មាជាមួយយើង ហើយយើងមានអំណរគុណចំពោះវា” ដោយសន្យាថា “គ្មានព្រំដែនក្នុងផ្នែកនយោបាយ សេដ្ឋកិច្ច និងជាពិសេសក្នុងន័យប្រវត្តិសាស្ត្រ” រវាងប្រទេសទាំងពីរ។

ចំណែកប្រធានាធិបតីប៉ូឡូញ បានសន្យាថា នឹងបន្តគាំទ្រទីក្រុងគៀវក្នុងជម្លោះនេះ ដោយបង្ហាញថា រដ្ឋបាលរបស់លោកបានត្រៀមខ្លួនរួចជាស្រេចក្នុងការបញ្ជូនយន្តហោះចម្បាំង MiG-29 ទាំងអស់របស់ខ្លួនទៅកាន់ប្រទេសអ៊ុយក្រែន “នៅពេលអនាគត”។ ប៉ូឡូញ ធ្លាប់បានសន្យាទិញយន្តហោះចម្បាំងចំនួន ១៤ គ្រឿងដែលផលិតដោយសូវៀត។

លោក Andrzej Duda បាននិយាយថា “ថ្ងៃនេះយើងកំពុងព្យាយាមដើម្បីទទួលបានសម្រាប់អ៊ុយក្រែន… ការធានាបន្ថែម ការធានាសន្តិសុខ ដែលនឹងពង្រឹងសក្ដានុពលយោធារបស់អ៊ុយក្រែន” ដោយបន្ថែមថា Kiev បាននិងកំពុងការពារអឺរ៉ុបទាំងមូលពីអ្វីដែលគាត់ហៅថា ការគំរាមកំហែងនៃ “ចក្រពត្តិនិយមរុស្ស៊ី” ៕ ប្រភពពី RT ប្រែសម្រួលដោយ៖ សារ៉ាត