​ភ្នំពេញ៖គណៈកម្មាធិការជាតិរៀបចំការបោះឆ្នោត (គ.ជ.ប)បានបញ្ជាក់ថា ដំណើរការទូទៅនៅថ្ងៃបោះឆ្នោតសម្រាប់ការបោះឆ្នោតលើកទី១(ការបោះឆ្នោតឡើងវិញ)ដើ​ម្បី​ជ្រើសរើសក្រុមប្រឹក្សាក្រុង ស្រុក ដែលទើ​បបំបែកនិងបង្កើតថ្មីទាំងប្រាំ ក្នុងខេត្តចំនួន​បីនោះ បានប្រព្រឹត្តទៅដោយរលូន មានសន្តិសុខ សុវ​ត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង។​

ក្រុង ស្រុក ដែលទើបបំបែក និងបង្កើតថ្មី ទាំងប្រាំនោះ រួមមាន ក្រុងអរិយក្សត្រ ក្រុងសំពៅពូន នៃខេត្តកណ្តាល, ក្រុងឧដុង្គម៉ែជ័យ ស្រុកសាមគ្គីមុនីជ័យនៃខេត្តកំពង់ស្ពឺ និងស្រុកអូរគ្រៀងសែនជ័​យ នៃខេត្តក្រចេះ​។

តាមសេចក្តីប្រកាសព័ត៌មានរបស់គ.ជ.ប នៅទី៩ ខែមេសា ឆ្នាំ២០២៣ បាន​ឱ្យដឹងថា ការិយា​ល័យបោះឆ្នោតទាំងប្រាំការិយាល័យ បានបើកដំណើរការបោះឆ្នោតព្រមៗគ្នានៅវេលាម៉ោង៧ព្រឹក សម្រាប់ឱ្យអង្គបោះឆ្នោតដែលជាសមាជិកក្រុមប្រឹក្សាឃុំ សង្កាត់ក្នុង មុខតំណែង ចំណុះឱ្យ​ក្រុង ស្រុក ពាក់ព័ន្ធ ធ្វើការបោះឆ្នោតតាមការកំណត់នៃច្បាប់។ គ.ជ.ប បាន​បញ្ជាក់ថា ៖ «ការិយាល័យបោះឆ្នោតទាំងអស់ត្រូវបានបិទបញ្ចប់ការបោះឆ្នោត

នៅម៉ោង ៨:២៥ ដោយសារ អ្នកបោះឆ្នោតបានមកបោះឆ្នោតគ្រប់ចំនួន ហើយគណៈកម្មការការិ​យាល័យបោះឆ្នោត បានបន្ត នីតិវិធី ដើម្បីរាប់សន្លឹកឆ្នោតជាបន្តបន្ទាប់»។

ប្រភពដដែលថា ៖ «ជារួម ដំណើរការនៃការបោះឆ្នោតបានប្រព្រឹត្តទៅដោយរលូន មានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងគ្មានការគំរាមកំហែង»។​

អ្នកនាំពាក្យគណបក្សហ៊ុនស៊ិនប៉ិច  លោក ញឿន រ៉ាដែន ដែលបានចូលរួមការបោះឆ្នោតនេះដែរ បានឱ្យដឹងថា នៅតាមឃុំសង្កាត់ នៃក្រុងស្រុកដែលបោះឆ្នោត គណបក្សលោកមិនមានបេក្ខភាពក្រុមប្រឹ​ក្សាឃុំសង្កាត់នោះទ។ ដូច្នេះ ជាលទ្ធផលគណបក្សហ៊ុនស៊ិនប៉ិចមិនទទួលបានសម្លេងគាំទ្រនោះទេ ប៉ុន្តែ អ្វីដែលសំខាន់ គឺគណបក្សបានបំពេញភារកិច្ច ដោយសង្ឃឹមថា នឹងមានរចនាសម្ព័ន្ធនៅពេលថ្ងៃអនាគត។

លោកបាន​បន្តថា ៖ «ដំណើការនៃការរៀបចំការបោះឆ្នោតរបស់គណៈកម្មាធិការជាតិរៀបចំការបោះឆ្នោត ប្រព្រឹត្តិទៅដោយរលូន ត្រឹមត្រូវ និងបង្ហាញពីជំហរលទ្ធិប្រជាធិតេយ្យ សេរីពហុបក្សដែ​លមានការចូលរួមពីភាគីពាក់ព័ន្ធ និងគ្រប់គណបក្សនយោបាយធំៗទាំង៣ នៅកម្ពុជា»។ ចំណែក លោក គឹមសួរ ភីរិទ្ធ អ្នកនាំពាក្យគណបក្សភ្លើងទៀន ក៏បាន​ប្រាប់ឱ្យដឹងដែរ​ថា តាមរយៈលទ្ធផលបឋម គណបក្សភ្លើងទៀន បានបាត់ ២ អាសនៈ មួយនៅស្រុកអូរគ្រៀងសែនជ័យ​ ខេត្តក្រចេះ

និងស្រុកសាមគ្គីមុនីជ័យ ​​ខេត្តកំពង់ស្ពឺ​។ ការបាត់នេះ ដោយសារតែមានការទិញដូរ ដោយគណបក្សមិនអាចគ្រ​ប់គ្រងលើអង្គបោះឆ្នោតបាន​។

ទោះជាយ៉ាងណា លោកបានបញ្ជាក់ថា ៖ «គណបក្សលោក​នឹងមានវិធានការក្រោយការបោះឆ្នោត ទៅលើបុ​គ្គលណា​ដែលលក់ឧត្តមគតិ ព្រោះគណបក្សភ្លើងទៀនដែលចូលរួមការបោះឆ្នោតនេះ ​ដើម្បីបំរើឆន្ទៈ​របស់ប្រជាពលរដ្ឋ។ ដូច្នេះ បុគ្គលណាដែលយកឧត្តមគតិ យកទៅឱ្យគេ ដែល​គ​ណបក្សយើងនឹងធ្វើការផ្លាស់ប្តូរ»។

ទោះជាយ៉ាងណា លោកថា លោកយល់ឃើញថា ដំណើការនៃការបោះឆ្នោតនេះ ប្រព្រឹត្តិទៅដោ​យរលូន និងមិនមានអ្វីជាបញ្ហាចោទនោះទេ ព្រោះជាការបោះឆ្នោតដោយតំណាង  ដែលពួកគាត់យ​ល់ដឹងច្រើនពីដំណើការនៃការបោះឆ្នោត។

ទន្ទឹមនឹងនេះដែរឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជាថា គណបក្សលោក​មានការសង្ឃឹម ១០០ ភាគរយ ចំពោះការបោះឆ្នោតនេះ ព្រោះអង្គបោះឆ្នោតភាគច្រើនមកពីគណបក្សប្រ​ជាជនកម្ពុជា ហើយដំណើការបោះឆ្នោតទៀតសោត ក៏ប្រព្រឹត្តិទៅដោយរលូន និងត្រឹមត្រូវ ព្រោះ​អង្គបោះឆ្នោត សុទ្ធសឹងតែជាមានពិសោធន៍រួចហើយដែរ។ ជាមួយគ្នានេះឯកឧត្តម សោម សូរីដា អ្នកនាំពាក្យគ.ជ.ប បាន​ប្រាប់នារសៀលថ្ងៃទី​៩ ខែមេសា ថា តាមរយៈលទ្ធផលបឋម គណបក្សប្រជាជកម្ពុជានាំមុខដាច់ គណបក្សពីរផ្សេងទៀត

នៅក្នុងការបោះឆ្នោតនេះ ខណៈគណបក្សភ្លើងទៀនឈរនៅលំដាក់លេខរៀងទី ២។

លោក​បានបន្តថា ការបោះឆ្នោតនេះមានតែគណបក្សនយោបាយចំនួនបីបាន​ចូលរួម គឺគណបក្សប្រជាជនកម្ពុជា គណបក្សហ៊ុនស៊ិនប៉ិច និងគណបក្សភ្លើងទៀន។

លោក សោម សូរីដា បញ្ជាក់ថា លទ្ធផលជាក់ស្តែងនឹងមានការផ្សាយផ្ទាល់​តាមរយៈគេហទំព័រ​ផ្លូវការ​របស់គណៈកម្មាធិការជាតិរៀបចំការបោះឆ្នោត (គ.ជ.ប)៕​

ដោយ៖គឹម យុត្ថារ៉ូ