ក្រសួងបរិស្ថានរួមជាមួយនឹងខេត្តចំនួនបីធ្វើយុទ្ធនាការ «កាត់បន្ថយការប្រើប្រាស់ថង់ប្លាស្ទិកនិងផ្សព្វផ្សាយកន្ត្រកបរិស្ថាន»
ក្រចេះ៖«កាត់បន្ថយការប្រើប្រាស់ថង់ប្លាស្ទិកនិងផ្សព្វផ្សាយកន្ត្រកបរិស្ថាន» គឺជាយុទ្ធនាការមួយដែលត្រូវបានក្រសួងបរិស្ថាន រួមជាមួយនឹងរដ្ឋបាលក្រុងក្រចេះ ខេត្តក្រចេះ បានរៀបចំឡើងកាលពីចុងសប្តាហ៍នេះ។ ក្រសួងបរិស្ថានបានឱ្យដឹងនៅថ្ងៃទី៩ ខែមេសា ឆ្នាំ២០២៣ថា យុទ្ធនាការនេះបានធ្វើឡើងក្រោមអធិបតីភាពឯកឧត្តម កែន សេរីរដ្ឋា អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថាន,ឯកឧត្តម ដាញ់ សេរី អគ្គនាយកនៃអគ្គនាយកដ្ឋានគាំពារបរិស្ថាន និងជាប្រធានស.ស.យ.ក
វិស័យបរិស្ថាន រួមជាមួយនឹងមន្រ្តីពាក់ព័ន្ធ សិស្សានុសិស្ស ប្រជាពលរដ្ឋ និងអាជីវករក្នុងផ្សារសាមគ្គីក្រុងក្រចេះប្រមាណ ៤០០នាក់។
យុទ្ធនាការនេះ ធ្វើឡើងក្នុងគោលបំណង ផ្សព្វផ្សាយជាផ្លូវការនូវចលនាទូលំទូលាយរួមគ្នាកាត់បន្ថយសំណល់ប្លាស្ទិកនៅកម្ពុជា តាមគោលការណ៍ស្ម័គ្រចិត្ត, ជំរុញ និងលើកទឹកចិត្តដល់អាជីវករឱ្យបញ្ឈប់ជាអចិន្រ្តៃយ៍នូវការផ្តល់ថង់ប្លាស្ទិកដោយមិនគិតថ្លៃដល់អតិថិជន និងចូលរួមចំណែកលើកស្ទួយជីវភាពរស់នៅរបស់ប្រជាពលរដ្ឋនៅតាមសហគមន៍ តាមរយៈការផលិតកន្រ្តកដែលធ្វើពីចចូតជាផលិតផលក្នុងស្រុក។
ឯកឧត្តម កែន សេរីរដ្ឋា បានថ្លែងឡើងនាឱកាសនោះថា លោកពិតជាមានក្តីសោមនស្សរីករាយដែលបាននាំយុទ្ធនាការនេះមកកាន់ខេត្តក្រចេះនេះ ដែលជាខេត្តដែលទើបតែទទួលបានជ័យលាភី ផ្ការំដួល២ទង ជាខេត្តមានទីក្រុងស្អាត។
លោកមានប្រសាសន៍ថា ៖ «យុទ្ធនាការនាពេលនេះ ជាការបំផុសស្មារតីរបស់សាធារណជនទូទៅឱ្យមានការប្រើប្រាស់ថង់ប្លាស្ទិកក្នុងភាគរយតិចបំផុត និងបញ្រ្ជាបការយល់ដឹងអំពីផលប៉ះពាល់នៃសំណល់សំរាម ជាពិសេសគឺសំណល់ប្លាស្ទិក ដែលបង្កគ្រោះថ្នាក់ដល់សុខភាពមនុស្ស និងគុណភាពបរិស្ថាន»។ ជាមួយគ្នានោះឯកឧត្តម កែន សេរីរដ្ឋា ក៏បានអំពាវនាវឱ្យប្រជាពលរដ្ឋរួបរួមគ្នាដើម្បីកិច្ចគាំពារបរិស្ថាន និងបន្តផ្សព្វផ្សាយបន្ថែមទៀត ដែលបង្ហាញពីការយកចិត្តទុកដាក់របស់ប្រជាជនទាំងអស់គ្នា
ដើម្បីឱ្យភពផែនដីរក្សាបាននូវនិរន្តរភាព និងភាពស្រស់បំព្រងសម្រាប់មនុស្សបច្ចុប្បន្ន និងមនុស្សជំនាន់ក្រោយ។
ចំណែកឯកឧត្តម ដាញ់ សេរី ក៏បានលើកឡើងដែរថា មនុស្សម្នាក់ៗប្រើប្រាស់ថង់ប្លាស្ទិក៤-៥ថង់ ក្នុងមួយថ្ងៃ ដោយហេតុប្រព័ន្ធសេដ្ឋកិច្ចរីកចម្រើន តម្រូវការរបស់មនុស្សលើការប្រើប្រាស់ថង់ប្លាស្ទិកក៏មានកាន់តែច្រើន។ ឯកឧត្តមបញ្ជាក់ថា៖ «បើមើលទៅទីក្រុងភ្នំពេញ សំណល់ប្លាស្ទិកមានដល់ទៅ១០លានថង់ក្នុងមួយថ្ងៃ និង១លានតោនក្នុងមួយឆ្នាំ ដែលអាចយកទៅកែច្នៃបានមានតែ៣ភាគរយប៉ុណ្ណោះ
ជាហេតុគួរឱ្យបារម្ភ។ដូច្នេះគឺតម្រូវឱ្យមានការចូលរួមទាំងអស់គ្នាដើម្បីកាត់បន្ថយសំណល់ប្លាស្ទិក»។
បើតាមការលើកឡើងរបស់អភិបាលរងខេត្តក្រចេះ លោក ហង់ ចាន់ឌីថា នៅខេត្តក្រចេះ កាកសំណល់សំរាមមានប្រមាណ ៣៧តោនក្នុងមួយថ្ងៃ ដែល៧០ភាគរយ នៃសំរាមបានយកទៅចាក់នៅទីលានចាក់សំរាម ប៉ុន្តែ៣០ភាគរយទៀតគឺនៅពាសវាលពាសកាលនៅឡើយ។
លោកថា ដូចនេះទើបទាមទារឱ្យមានការចូលរួមថែរក្សាបរិស្ថាន ទៅតាមលំនាំស្អាត៣គឺ ស្អាតទឹក ស្អាតដី និងស្អាតខ្យល់។
យោងតាមក្រសួងបរិស្ថាន យុទ្ធនាការសម្រាប់ឆ្នាំ២០២៣នេះ បានរៀបចំឡើងក្នុងខេត្តចំនួនបីរួមមាន ខេត្តកោះកុង ខេត្តស្ទឹងត្រែង និងចុងក្រោយ គឺខេត្តក្រចេះ៕ដោយ៖នាង សុគន្ធា
