ព្រះសីហនុ៖សាលពិព័រណ៍គម្រោងប្លាទីនៀម ខស( Platinum Coast) ផ្ទាំងផ្សព្វផ្សាយ 3D និងទឹករាំជាមួយភ្លើងចម្រុះទី១ ស្ថិតនៅឃុំរាម ស្រុកព្រៃនប់ ខេត្តព្រះសីហនុ ត្រូវបានសម្ពោធដាក់ឱ្យដំណើការជាផ្លូវការ ដើម្បីឆ្លើយតបទៅនឹងការររីកចំរើន និងសក្តានុពលខេត្តព្រះសីហនុ ដែលបាននិងកំពុងប្រែក្លាយទៅជាតំបន់សេដ្ឋកិច្ចពហុបំណង។

យោងតាម​រដ្ឋបាលខេត្តព្រះសីហនុ ​ពិធីសម្ពោធដាក់ឱ្យដំណើការនេះ ធ្វើឡើងកាលពីថ្ងៃទី ៨ ខែមេសា ឆ្នាំ២០២៣  ដែលនា​ឱកាសនោះឯកឧត្តម គួច ចំរើន អភិបាលខេត្តព្រះសីហនុបានលើកឡើង​ថា ការសម្ពោធសាលពិព័រណ៍គម្រោង Platinum Coast ផ្ទាំងផ្សព្វផ្សាយ 3D និងទឹករាំជាមួយភ្លើងចម្រុះទី១ ​នា​ខេត្តព្រះសីហនុ ជាសក្ខីភាពដែលបង្ហាញឱ្យឃើញពីការជឿជាក់របស់អ្នកវិនិយោគទុនមកលើរាជរដ្ឋាភិបាលកម្ពុជា​។

ឯកឧត្តមមានប្រសាសន៍ថា ៖ «គម្រោងនេះពិតជាបានផ្តល់នូវ​ការងារដល់​ប្រជាពលរដ្ឋនៅខេត្តព្រះសីហនុ ក៏ជាការចូលរួមចំ​ណែកក្នុងការលើកកម្ពស់កម្រិតជីវភាព និងកាត់បន្ថយភាពក្រីក្ររបស់ប្រជាពលរដ្ឋស្របតាមគោលនយោបាយ និងយុទ្ធសា​​ស្រ្តចតុកោណដំណាក់កាលទី៤ របស់រាជរដ្ឋាភិបាលកម្ពុជា ដើម្បីកំណើនការងារ សមធម៌ និងប្រសិទ្ធភាពនៅកម្ពុជា​»។

ឯកឧត្តម  គួច ចំរើន ​បញ្ជាក់ទៀតថា ខេត្តព្រះសីហនុ មានសក្តានុពលដ៏លេចធ្លោជាមួយនឹងសន្ទុះ នៃការអភិវឌ្ឍរីកច​ម្រើន និងកាលានុវត្តភាពវិនិយោគជាតិ និងអន្តរជាតិ បច្ចុប្បន្នខេត្តព្រះសីហនុ ត្រូវបានរាជរដ្ឋាភិបាលកម្ពុជាកំណត់ជា «តំប​ន់​សេដ្ឋកិច្ចពិសេសគំរូពហុបំណង» និងប្រសិទ្ធនាមជា «តារារះនាទិសនិរតី» ស្របតាមគោលនយោបាយអភិវឌ្ឍន៍វិស័យ​ឧស្សាហកម្មកម្ពុជាឆ្នាំ២០១៥-២០២៥ សំដៅជំរុញកំណើនសេដ្ឋកិច្ចជាតិ ជាប្រទេសមានចំណូលមធ្យមកម្រិតខ្ពស់នាឆ្នាំ២​០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

បើតាមឯកឧត្តម គួច ចំរើន បច្ចុប្បន្នខេត្តព្រះសីហនុ មានសហគ្រាសតូច-ធំ ចំនួន២២១ និងមានតំបន់សេដ្ឋកិច្ចពិសេសចំ​នួន ១១ទីតាំង ដែលមាន៤ទីតាំង កំពុងដំណើរការ។ ផ្អែកតាមចក្ខុវិស័យ និងគោលនយោបាយនាពេលអនាគតដ៏ខ្លីខាងមុ​ខនេះ ខេត្តព្រះសីហនុ សង្ឃឹមថានឹងទទួលបានវិនិយោគិនបរទេសជាបន្តបន្ទាប់មកវិនិយោគ ធ្វើពាណិជ្ជកម្ម និងការធ្វើទេ​ស​ចរណ៍នៅខេត្តព្រះសីហនុកាន់តែច្រើននាពេលខាងមុខ។  ​ យោងតាម​សម្រង់សម្ដី​របស់​រដ្ឋបាលខេត្តព្រះសីហនុ ​លោក ​Cao Jun នាយកប្រតិបត្តិគម្រោង Platinum Coast បាន​ថ្លែងដែរថា Platinum Coast ជាគម្រោងរមណីយដ្ឋានប្រណិតជាប់លំដាប់ពិភពលោក ត្រូវបានសាងសង់នៅក្នុងទីក្រុងទេ​សចរណ៍ វប្បធម៌ Sihanoukville New City of LIXIN មានទំហំដី ២,៥០០ហិកតា និងបង្កើតឡើងររវាងក្រុមហ៊ុន LIXIN Group និងក្រុមហ៊ុន Honchen Group។

លោកបន្តថា គម្រោងនេះហ៊ុមព័ទ្ធ​ដោយធនធានធម្មជាតិមានទីតាំងជាប់នឹងភ្នំ បែរមុខទៅរកសមុទ្រ ហើយក៏ជាតំបន់ឆ្នេរសមុទ្រដំបូងគេនៃទីក្រុង Sihanoukville New City of LIXIN ជាមួយនឹងការបញ្ចប់ជាបន្តបន្ទាប់នៃគម្រោងធំៗមិនត្រឹមតែជាមជ្ឈមណ្ឌលទីក្រុងថ្មីសំខាន់របស់ក្រុងព្រះសីហនុនាពេលអនាគតទេ តែ​ទីនេះក៏ជាគោលដៅទេសចរណ៍វប្បធម៌អេកូឡូស៊ីសកលលោក ដែលទាក់ទាញភ្ញៀវទេសចរមកពីជុំវិញពិភពលោក និងជាមជ្ឈមណ្ឌលឧស្សាហកម្មអាស៊ីអាគ្នេយ៍នៃគ​ម្រោង ផ្លូវមួយ ខ្សែក្រវ៉ាត់មួយ។ ​

លោក ​Cao Jun ថ្លែងថា  ការបើកដំណើរការផ្លូវល្បឿនលឿនគួបផ្សំជាមួយនឹងព្រឹត្តិការណ៍កីឡាអាស៊ីអាគ្នេយ៍ឆ្នាំនេះ ទីក្រុ​ងព្រះសីហនុបានផ្លាស់ប្តូរូបរាងថ្មី ខ្ញុំជឿជាក់ថា ក្រុងព្រះសីហនុមានឆ្នេរសមុទ្រស្រស់ស្អាតបំផុតក្នុងប្រទេសកម្ពុជា និងឈា​នទៅរកការរីកចំរើនកាន់តែខ្លាំងក្នុងវិស័យទេសចរណ៍ និងវិស័យដទៃទៀត។

គម្រោង PLATINUM COAST គឺ​សាងសង់​នៅលើ​ខ្នងភ្នំ​ដល់​បាតសមុទ្រ ដែលមានកម្ពស់​ ២០០​ ម៉ែត្រ ទៅតាមស្ថានភាព​ដី​ ធនធានធម្មជាតិ​ពី​ខ្នងភ្នំ និង​សមុទ្រ ដោយ​បានបែងចែក​ទៅជា​ ៧ ​តំបន់​មាន​ទាំង​សមុទ្រមាន​ទាំង​ភ្នំ និង​ឆ្នេរសមុទ្រ​ពីរ​។ តំបន់​ទាំងនោះរួមមាន តំបន់​កម្សាន្ត​មាត់សមុទ្រ​មាន​ឆ្នេរ​ខ្សាច់​ពណ៌​ផ្កាឈូក តំបន់​លំហែ​មាត់សមុទ្រ​ដ៏​រ៉ូ​មែន​ទិក តំបន់​លំ​ហែ​ផ្តល់​អារម្មណ៍​លំហែ​បែប​ផ្សងព្រេង តំបន់​ពាណិជ្ជកម្ម​ដែល​ទាក់ទង ​និង​ប្រធានបទ​មហាសមុទ្រ​ដ៏​អាថ៌កំបាំងតំបន់​ពា​ណិជ្ជកម្ម​ស្ថិតនៅ​ចំ​កណ្តាល ​រវាង​

សមុទ្រ​ និង​ភ្នំ តំបន់​លំហែ​ជ្រលង​ភ្នំ​និង​ព្រៃឈើ​អាថ៌កំបាំង និងតំបន់​ពាណិជ្ជកម្ម​អន្តរជាតិ​លំដាប់​កំពូល​៕

ដោយ៖គឹម យុត្ថារ៉ូ