ការចុះឈ្មោះក្នុងបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតសកល ក្នុងរយៈពេល៤ថ្ងៃកន្លងមកនេះ មានចំនួន៨គណបក្សហើយ។ ការចុះបញ្ជីនៅថ្ងៃទី២៧ មេសានេះ គឺមានមួយគណបក្សឈ្មោះគណបក្សខ្មែរអភិរក្ស។

ចំណែក៧គណបក្សទៀតដែលបានចុះបញ្ជីរួចមកនេះ រួមមានគណបក្សប្រជាជនកម្ពុជា, គណបក្សយុវជនកម្ពុជា, គណបក្សខ្មែររួបរួមជាតិ, គណបក្សធម្មាធិបតេយ្យ, គណបក្សកម្លាំងប្រជាធិបតេយ្យ, គណបក្សសញ្ជាតិកម្ពុជា និងគណបក្សខ្មែរតែមួយ។

គណបក្សភ្លើងទៀន នៅតែមិនទាន់មកចុះឈ្មោះក្នុងបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតនៅឡើយទេ។ យោងតាម គជប ការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសតាំងតំណាងរាស្រ្តនីតិកាលទី៧ នឹងមានរយៈពេល១៥ថ្ងៃ ចាប់ផ្តើមនៅថ្ងៃច័ន្ទទី២៤ មេសា រហូតដល់ថ្ងៃទី៨ ឧសភា។ មន្ត្រីគជបបានរំពឹងថាចំនួនគណបក្សដែលនឹងអាចមកចុះជាបន្តបន្ទាប់រហូតដល់ថ្ងៃចុងក្រោយនោះ នឹងអាចស្ថិតក្រោម២០គណបក្ស។