ខេត្តកំពត ៖ ក្រុមកីឡាករកីឡាការនីជម្រើសជាតិកីឡាទូកប្រពៃណីកម្ពុជានៅថ្ងៃប្រកួតទី១នៃព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ដំណើរការប្រកួតនៅក្រុងកំពត ខេត្តកំពត ដែលប្រកួតលើ៥វិញ្ញាសា ដណ្តើមបានមេដាយជូនកម្ពុជាសរុប៤គ្រឿងខណៈវិញ្ញាសាទូកនាគចំណុះ១២នាក់បុរសនារី ពុំទទួលបានមេដាយឡើយ។

លោក ស្រ៊ុន លាង អគ្គលេខាធិការរង សហព័ន្ធកីឡាទូកកានូ និងរ៉ូអ៊ីងកម្ពុជា និងជានាយកបច្ចេកទេសគ្រប់គ្រងទីលានកីឡានៃការប្រកួតស៊ីហ្គេម បានបញ្ជាក់ឲ្យដឹងថា សម្រាប់ថ្ងៃដំបូងការប្រកួតកីឡាទូកនៃព្រឹត្តិការណ៍កីឡាស៊ីហ្គេម លើកទី៣២ ដែលធ្វើឡើងនៅទឹកដីខេត្ត កំពត ដំណើរការប្រកួតលើ៥វិញ្ញសា ក្រុមជម្រើសជាតិកីឡាទូកកម្ពុជា ដណ្តើមបានមេដាយជូនកម្ពុជាចំនួន៤គ្រឿង ហើយ មេដាយទាំង៤គ្រឿងនេះ គឺប្រាក់២គ្រឿងនិងសំរិទ្ធ២គ្រឿង។

លោក ស្រ៊ុន លាង បានបញ្ជាក់ទៀតថា សម្រាប់ការទទួលធ្វើជាម្ចាស់ផ្ទះនៃព្រឹត្តិការណ៍កីឡាស៊ីហ្គេម លើកទី៣២ ដែលកម្ពុជាទទួលធ្វើជាម្ចាស់ផ្ទះនេះ ទីតាំងដែលជាទីលានប្រកួតគឺបានរៀបចំស្តង់ដា១០០% មិនមានខ្វះចន្លោះទេទេ ។ទាំងអស់នេះ ដោយសារទទួលបានការគាំទ្រពីថ្នាក់ដឹកនាំទាំងសម្ភារៈនិងថវិកាសម្រាប់ដំណើរការនៃការរៀបចំ ហើយចំពោះធនធានមនុស្សបានបំពេញការងារបានល្អខ្លាំងណាស់ ដោយសារតែពួកគាត់ដែលជាមន្រ្តីគណៈកម្មកាថ្នាក់ជាតិរបស់យើងទទួលបានការបណ្តុះច្រើនកាលពីកន្លងមក ពិសេស មានការគាំទ្រពីអ្នកស្ម័គ្រអន្តរជាតិ៤រូបជួយជំរុញណែនាំបន្ថែមដល់គណៈកម្មការថ្នាក់ជាតិលើការងារបច្ចេកទេស។

លោក នាយកគ្រប់គ្រងទីលានរូបនេះ បានលើកឡើងទៀតថា សម្រាប់លទ្ធផលទទួលបាននៅថ្ងៃទី១ ក្រុមទូកកម្ពុជាយើងបានល្អខ្លាំងណាស់ ហើយលទ្ធផលនេះ នឹងជំរុញក្រុមកីឡាករកីឡាការិនីកម្ពុជាយើងកាន់តែមានទឹកចិត្តប្រកួតបន្ថែមទៀត ដើម្បីស្វែងរកមេដាយបន្ថែមជូនកម្ពុជា។

សូមបញ្ជាក់ថា ការប្រកួតទូកនៃព្រឹត្តិការណ៍កីឡាស៊ីហ្គេម លើកទី៣២ ដែលធ្វើឡើងនៅខេត្ត កំពត ក្រុង កំពត មាន២វិញ្ញសាធំៗ គឺទូកនាគ ចំណុះ១២នាក់ និងទូកផ្កាចា ចំណុះ៥នាក់ និង៣នាក់ ហើយការប្រកួតនៅថ្ងៃដំបូងធ្វើការប្រកួតលើ៥វិញ្ញសា ដូចជា ទូកនាគចំណុះ១២នាក់បុរស អាយុក្រោម២៤ឆ្នាំអ៊ុចម្ងាយ២៥០ម៉ែត្រ ក្រុមកម្ពុជាទទួលបានមេដាយសំរិទ្ធ មេដាយប្រាក់ក្រុមប្រទេសវៀតណាម និងមេដាយមាសបានទៅលើក្រុមឥណ្តូនេស៊ី។ វិញ្ញសាទូកនាគចំណុះ១២នាក់បុរសអាយុលើស២៤ឆ្នាំប្រកួតចម្ងាច២៥០ម៉ែត្រ ក្រុមកម្ពុជាទទួលបានមេដាយសំរិទ្ធ មេដាយប្រាក់បានទៅលើក្រុមប្រទេសម៉ាឡេស៊ី និងក្រុមមេដាយមាសបានទៅលើក្រុមប្រទេសថៃ។ វិញ្ញាសា ទូកផ្កាចាបុរស អាយុក្រោម២៤ឆ្នាំ ចំណុះ៥នាក់បុរសអ៊ុចម្ងាយ២៥០ម៉ែត្រ ក្រុមកម្ពុជាទទួលបានមេដាយប្រាក់ខណៈក្រុមមេដាយសំរិទ្ធបានទៅលើក្រុមប្រទេសថៃ និងក្រុមម៉ាឡេស៊ីមេដាយមាស។វិញ្ញសាទូកផ្កាចា នារីចំនុះ៣នាក់ អ៊ុចម្ងាច២៥០ម៉ែត្រ មេដាយប្រាក់បានទៅលើក្រុមកម្ពុជា ខណៈម៉ាឡេស៊ីទទួលបានមេដាយសំរិទ្ធ និងក្រុមមេដាយមាសក្រុមប្រទេសវៀតណាម។វិញ្ញាសាប្រកួតចម្រុះបុរសនារី ចំណុះ១២នាក់ អាយុក្រោម២៤ឆ្នាំ អ៊ុចម្ងាច២៥០ម៉ែត្រក្រុមដណ្តើមបានមេដាយប្រទេសថៃ មេដាយប្រាក់ក្រុមម៉ាឡេស៊ី និងក្រុមមេដាយសំរិទ្ធ បានទៅលើប្រទេសឥណ្តូនេស៊ី ៕

អត្ថបទ ៖ ជាវ ចន្ធូ