ហ៊ីរ៉ូស៊ីម៉ា៖ សហភាពអឺរ៉ុបបាននិយាយថា ខ្លួននឹង “រឹតបន្តឹង” ការជួញដូរពេជ្ររបស់ប្រទេស រុស្ស៊ី។

ប្រធានក្រុមប្រឹក្សាអ៊ឺរ៉ុប លោក ឆាលស៍ មីឈែល (Charles Michel) និយាយថា ប្លុកនេះនឹងកំណត់គោលដៅពាណិជ្ជកម្មរកប្រាក់ចំណេញ លើត្បូងពេជ្ររុស្ស៊ី ដែលជាផ្នែកមួយនៃការជំរុញជាថ្មី ដើម្បីរារាំងសកម្មភាពយោធារបស់ទីក្រុងម៉ូស្គូ នៅអំឡុងពេលសន្និសីទសារព័ត៌មាន មុនកិច្ចប្រជុំកំពូលនៃក្រុមប្រទេសឧស្សាហកម្មអភិវឌ្ឍន៍ជួរមុខនៅលើពិភពលោក ហៅកាត់ថា G7 នៅទីក្រុងហ៊ីរ៉ូស៊ីម៉ា ប្រទេសជប៉ុន។

មេដឹកនាំនៃក្រុមប្រទេសទាំងប្រាំពីរ (G7) នឹងពិភាក្សាអំពីរបៀបតាមដានការជួញដូរពេជ្ររបស់រុស្ស៊ី នៅក្នុងកិច្ចប្រជុំកំពូលមួយ ក្នុងសប្តាហ៍នេះ ដោយមានគោលបំណងដាក់ការរឹតបន្តឹងនៅដំណាក់កាលបន្ទាប់ នេះបើតាមលោក ឆាលស៍ មីឈែល (Charles Michel) បាននិយាយ កាលពីថ្ងៃព្រហស្បតិ៍ សប្តាហ៍នេះ។

មន្ត្រីសហភាពអឺរ៉ុបរូបនេះបានប្រាប់អ្នកយកព័ត៌មាន នៅក្នុងសន្និសីទសង្ខេបមួយថា “អ្នកអាចរំពឹងថារឿងនេះនឹងត្រូវបានលើកឡើងនៅក្នុងសេចក្តីថ្លែងការណ៍របស់ G7” ។

មន្ត្រីរូបនេះបាននិយាយថា នឹងមិនមានកិច្ចព្រមព្រៀងនៅដំណាក់កាលនេះទេ ប៉ុន្តែលោកមានទំនុកចិត្តថា កិច្ចពិភាក្សារវាងមេដឹកនាំនៅទីក្រុងហ៊ីរ៉ូស៊ីម៉ា ប្រទេសជប៉ុន ចន្លោះពីថ្ងៃទី ១៩ ដល់ ២១ ខែឧសភា នឹងបើកទ្វារឱ្យដាក់យន្តការតាមដានមួយ មុនពេលការរឹតបន្តឹងត្រូវបានអនុវត្ត៕ ប្រភពពី AFP ប្រែសម្រួល៖ សារ៉ាត