មន្ទីពេទ្យគន្ធបុប្ផាសៀមរាប ព្យាបាលកុមារីមានជំងឺគ្រុនឈាមធ្ងន់ធ្ងរ បាត់ជីពចររហូតប្រាំពីរដង បានធូរស្បើយវិញ
សៀមរាប៖ មន្ទីពេទ្យគន្ធបុប្ផាសៀមរាបបានជួយសង្រ្គោះ និងព្យាបាលកុមារីអាយុប្រាំឆ្នាំម្នាក់ ពីជំងឺគ្រុនឈាម ដែលកុមារីនេះ មានអាការៈធ្ងន់ធ្ងរ រហូតបន្ទោបង់លាមកមានឈាម បាត់ជីពចររហូតដល់ប្រាំពីរដង គ្រុនក្តៅ ក្អួតចង្អោរ និងឈឺពោះផងដែរ។
តាមការប្រកាសឱ្យដឹងពីមូលនិធិមន្ទីរពេទ្យគន្ធបុប្ផាកម្ពុជា នៅថ្ងៃទី៥ ខែមិថុនា បានឱ្យដឹងថា កាលពីពេលថ្មីៗនេះ មន្ទីរពេទ្យគន្ធបុប្ផាបានប្រកាសពីការសង្រ្គោះជីវិតកុមារីម្នាក់អាយុប្រាំឆ្នាំ មកពីស្រុកវ៉ារិន ខេត្តសៀមរាប បន្ទាប់ពីកុមារីរូបនេះមានអាការៈគ្រុនក្តៅ ក្អួតចង្អោរ ឈឺពោះ រយៈពេលបួនថ្ងៃ និងបានព្យាបាលនៅមណ្ឌលសុខភាពដោយបានចាក់ថ្នាំ និងដាក់សេរ៉ូមអស់ប្រាំប្លោក។
មូលនិធិមន្ទីរពេទ្យគន្ធបុប្ផាកម្ពុជា បានឱ្យដឹងថា ដោយឃើញកូនកាន់តែសន្លឹម ម្តាយក៏សម្រេចចិត្តបញ្ជូនកូនមកព្យាបាលបន្តនៅមន្ទីរពេទ្យជ័យវរ្ម័នទី៧ (គន្ធបុប្ផាសៀមរាប) នៅថ្ងៃទី ២៥ ខែឧសភា ឆ្នាំ២០២៣។ ពេលមកដល់មន្ទីរពេទ្យគន្ធបុប្ផាសៀមរាបកុមារី មានសភាពធ្ងន់ធ្ងរសន្លឹម បត់ជើងធំមានឈាម បាត់ជីពចររហូតដល់ប្រាំពីរដង និងបានជួយសង្គ្រោះដោយប្រើសេរ៉ូម ដាក់អុកស៊ីសែន បញ្ចូលឈាមពីរប្លោក និងប្លាស្មា១០ប្លោកផងដែរ។
បន្ទាប់ពីធ្វើការពិនិត្យ តាមដានដោយយកចិត្តទុកដាក់រយៈពេល១០ថ្ងៃ កុមារីរូបនេះបានធូរសះស្បើយ និងបានអនុញ្ញាតឱ្យចេញពីមន្ទីរពេទ្យ កាលថ្ងៃទី៣ ខែមិថុនា កន្លងមកនេះ។ នេះបើតាមការបញ្ជាក់បន្ថែម ពីមូលនិធិមន្ទីរពេទ្យគន្ធបុប្ផាកម្ពុជា។
យោងតាមរបាយការណ៍ពីមន្ទីរពេទ្យកុមារគន្ធបុប្ផា បានឱ្យដឹងដែរថា ក្នុងរយៈពេល ប្រាំខែ ឆ្នាំ២០២៣កុមារចំនួន ៣២០ ៩២១ នាក់ ត្រូវបានពិនិត្យព្យាបាល នៅក្នុងផ្នែកពិគ្រោះជំងឺក្រៅ នៅមន្ទីរពេទ្យកុមារគន្ធបុប្ផា ពោលចំនួននេះ គឺមានការកើន ៥២ភាគរយ ច្រើនជាងឆ្នាំ២០២២។ ជាមួយគ្នានេះ កុមារមានជំងឺធ្ងន់ធ្ងរចំនួន ៧៤ ៩៧៥នាក់ ត្រូវបានសម្រាកព្យាបាលនៅក្នុងមន្ទីរពេទ្យ ពោលចំនួននេះ កើន ១០៨ភាគរយ ច្រើនជាងឆ្នាំ២០២២។
លើសពីនេះ មានកុមារចំនួន ៣៧៥ នាក់ មានជំងឺគ្រុនឈាមធ្ងន់ធ្ងរ ត្រូវបានសម្រាកព្យាបាលក្នុងមន្ទីរពេទ្យ, កុមារចំនួន ១០ ៣៩១ នាក់ បានទទួលការវះកាត់ ខណៈវះកាត់បេះដូង និងភ្ជិតប្រហោងបេះដូងតាមសរសៃឈាម នៅមន្ទីរពេទ្យកុមារគន្ធបុប្ផាសៀមរាប និងភ្នំពេញ បានចំនួន ៣៦៧ នាក់។
របាយការណ៍ដដែលបានបន្តថា ស្ត្រីមានផ្ទៃពោះចំនួន ៤២ ០៩៥ ករណី បានមកពិនិត្យតាមដានផ្ទៃពោះនិងព្យាបាល នៅក្នុងផ្នែកពិគ្រោះជំងឺក្រៅ នៃមន្ទីរសម្ភព និងសម្រាលកូននៅមន្ទីរពេទ្យជ័យវរ្ម័នទី៧ (គន្ធបុប្ផាទី៣ ខេត្តសៀមរាប) បានចំនួន ៨ ៣១៩នាក់ មានការកើន ៣៥ភាគរយ។
នាពិធីប្រគល់ និងទទួលថវិកាពីកាកបាទក្រហមកម្ពុជាចំនួនមួយលានដុល្លារអាម៉េរិក នៅថ្ងៃទី១ ខែមិថុនា កន្លងទៅនេះ លោក រស់ សីលវ៉ា នាយកប្រតិបត្តិមូលនិធិគន្ធបុប្ផាកម្ពុជា បានលើកឡើងដែរថា រាល់ការបន្តចូលរួមចំណែកជាមួយមូលនិធិគន្ធបុប្ផាកម្ពុជា គឺពិតជាបានបង្ហាញពីការគិតគូរក្នុងការលើកកម្ពស់សុខុមាលភាពកុមារ ដែលជាមូលធនមនុស្សនៅកម្ពុជា និងជាទំពាំងស្នងឬស្សីរបស់ប្រទេសជាតិ។
លើសពីនេះ លោក បានថ្លែងបន្តថា ៖ «វិភាគទានដ៏ថ្លៃថ្លារបស់កាកបាទក្រហមកម្ពុជា ក៏ដូចសប្បុរសជននានា នឹងចូលរួមចំណែកធានានូវចីរភាពនៃកិច្ចដំណើរការរបស់មន្ទីរពេទ្យកុមារគន្ធបុប្ផា ព្រមទាំងធានាថាកុមារកម្ពុជា នឹងបន្ដទទួលបានការធានានូវការគាំពារផ្នែកសុខភាព»។
ប្រធានកម្មវិធីជាតិប្រយុទ្ធប្រឆាំងជំងឺគ្រុនឈាម នៃក្រសួងសុខាភិបាល លោក លាង ឬទ្ធា បានប្រាប់កាលពីថ្ងៃទី១ ខែមិថុនាថា ក្នុងរយៈពេល ២០ សប្ដាហ៍នៃឆ្នាំ២០២៣នេះ ករណីជំងឺគ្រុនឈាម មានចំនួន ២ ៦៦៦ ករណី ដោយក្នុងនោះ មានករណីស្លាប់ ៥ករណី ដែលមានការកើនឡើងជាង ១០០ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំ២០២២ ដែលចំនួន ១ ១៤០ ករណី និងស្លាប់១ករណី។
លោកបានឱ្យដឹងដែរថា កម្មវិធីជាតិប្រយុទ្ធប្រឆាំងជំងឺគ្រុនឈាម បានអនុវត្តវិធានការផ្សេងៗ ដើម្បីប្រយុទ្ធប្រឆាំងនឹងការរីករាលដាលនៃជំងឺគ្រុនឈាម ដោយបានរៀបចំថ្នាំអាបែត (Abate) សម្លាប់មូសខ្លា ចំនួន ២៣០ តោន និងថ្នាំគីមីសម្រាប់បាញ់ចំនួន ៦០០០ លីត្រ។
ខេត្តដែលមានករណីជំងឺគ្រុនឈាមខ្ពស់មានដូចជា ខេត្តកំពង់ចាម កណ្ដាល តាកែវ ត្បូងឃ្មុំ ព្រះវិហារ សៀមរាប ព្រះសីហនុ និងរាជធានីភ្នំពេញ៕
ដោយ៖បូរ ពេជ្រហ្សាលីន
