ភ្នំពេញ៖ ស្ថានទូតបារាំងប្រចាំកម្ពុជាក្រោមកិច្ចសហប្រតិបត្តិការជាមួយ OIF បានបើកវគ្គបណ្ដុះបណ្ដាលភាសាបារាំង ដែលមានរយៈពេលពីរឆ្នាំ​ដល់កងកម្លាំងនៃមជ្ឈមណ្ឌលជាតិ គ្រប់គ្រងកងកម្លាំងរក្សាសន្តិភាព កា​របោសសម្អាតមីន និងកាកសំណល់សង្គ្រាម (NPMEC)។

ពិធីបើកវគ្គបណ្ដុះបណ្ដាលនេះត្រូវបានធ្វើកាលពីថ្ងៃទី៣ ខែកក្កដាឆ្នាំ២០២៣ ដោយមានការចូលរួមពីលោក Edgar DOERIG តំណាង OIF ប្រចាំតំបន់អាស៊ីនិងប៉ាស៊ីហ្វិក, ឯកឧត្តម អ៊ូច បូរិទ្ធ រដ្ឋលេខាធិការប្រចាំការក្រសួងការបរទេស និងសហប្រតិបត្តិការអន្តរជាតិ និងលោក Jacques Pellet ឯកអគ្គរដ្ឋទូតបារាំងប្រចាំកម្ពុជា ​នា​​មជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព ការបោសសម្អាតមីន និងកាកសំណល់សង្គ្រាម​។

នាឱកាសនោះ លោក Edgar DOERIG ​ បាន​ថ្លែង​ឱ្យដឹងថា ការចេះភាសាបារាំង គឺជាស្ពានដ៏សំខាន់មួយដែលនាំមកនូវ បង្កើតចំណងទំនាក់ទំនង ការជឿទុកចិត្ត​ជាមួយអាជ្ញាធរដែនដី ប្រជាជន បង្កើនប្រសិទ្ធភាពប្រតិបត្តិការរក្សាសន្តិភាព ការប្រាស្រ័យទាក់ទង និងវប្បធម៌ក្នុងតំបន់។

លោកបន្តថា ​ភាពស្ទាត់ជំនាញភាសាបារាំងនេះ វាក៏ជួយសម្រួលដល់ការជួយគ្នាទៅវិញទៅមក ជាមួយកងកម្លាំងដៃគូរ ព្រមទាំងរួមចំណែកដល់ការកសាងសន្តិភាព និងស្ថិរភាពយូរអង្វែងផងដែរ។

លោក Edgar DOERIG ក៏បានបញ្ជាក់ដោយ​លោក​ធានាចំពោះការផ្តល់ជំនួយក្នុងនាម OIF សម្រាប់ការបណ្តុះបណ្តាលនេះតាមតម្រូវការរបស់ NPMEC ដើម្បីពង្រឹងជំនាញភាសា ដល់នាយទាហានដែលត្រៀមចេ​ញទៅបំពេញបេសសកម្ម របស់ អ.ស.ប ក្នុងតំបន់និយាយភាសាបារាំង។​

​លោកមានប្រសាសន៍ថា ៖ «សិក្ខាកាមថ្នាក់ឆ្នាំ២០២៣ ដែលបានជ្រើសរើសយកការសិក្សាភាសាបារាំង សម្រាប់កងកម្លាំងយោធានេះ ជាការរួមចំណែមួយចំពោះប្រសិទ្ធភាពនៃប្រតិបត្តិការសន្តិភាព នៅក្នុងតំ​បន់និយាយភាសាបារាំង ដូចជានៅអាហ្វ្រិក និងប្រទេសលីបង់ជាដើម»។

លោកបញ្ជាក់ថា ៖ «ដោយសារជំនាញដែលទទួលបាន ពួកគេនឹងអាចសម្របសម្រួល ធ្វើការរួមគ្នា បានកាន់តែប្រសើ ពង្រឹងកិច្ចសហប្រតិបត្តិការ ជាមួយកងកម្លាំងជាតិ ពហុជាតិ ដែលកំពុងមានវត្តមាននៅក្នុងតំបន់បេសសកកម្ម»។

​អស់រយៈពេល ៣០ឆ្នាំកន្លងមកហើយ ដែលប្រទេសកម្ពុជាបានទទួលកងកម្លាំងរក្សាសន្តិភាព ឥឡូវកម្ពុជា បានក្លាយខ្លួនជាប្រទេសយ៉ាងសំខាន់ ក្នុងប្រតិបត្តិការសន្តិភាព របស់អ.ស.ប មានកងកម្លាំងកម្ពុជាជាង ៨០០នាក់ បានកំពុងបំពេញបេសសកកម្ម ខណៈដែលជំនាញវិជ្ជាជីវៈ របស់កងយោធពលខេមរភូមិន្ទ ឥឡូវនេះក៏ត្រូវបានទទួលស្គាល់ជាលក្ខណៈអន្តរជាតិផងដែរ។

ជាមួយគ្នានេះឯកឧត្តម អ៊ូច បូរិទ្ធ ​ក៏បានថ្លែងដែរ​ថា ឆ្នាំ២០២៣នេះ គឺជាខួបលើកទី៣១ នៃវត្តមានកងយោ​ធាមួកខៀវអង្គការសហប្រជាជាតិនៅលើទឹកដីកម្ពុជា ដែលក្នុងនោះក៏មានវត្តមានកងកម្លាំងរក្សាសន្តិភាពបារាំង ក្នុងការចូលរួមចំណែកជួយរក្សាសុខសន្តិភាពនៅលើទឹកដីដ៏កម្សត់ ដែលពោរពេញដោយជម្លោះ និងការហែកហួរដោយសង្គ្រាម។

ឆ្លៀតក្នុងឱកាសនោះដែរ​ តាងនាមឱ្យរាជរដ្ឋាភិបាល ​និងប្រជាជនកម្ពុជា ឯកឧត្តមបាន​សម្តែងនូវក្តីអំណរអរគុណចំពោះកងយោធាមួកខៀវបារាំង និងសូមសម្តែងនូវគារវៈកិច្ចយ៉ាងជ្រាលជ្រៅបំផុតចំពោះវិញ្ញាណក្ខន្ឋវិរៈយោធាបារាំងបួនរូប ដែលបានពលីជីវិត ក្នុងការបំពេញបេសកកម្មដ៏ឧត្តុងឧត្តមនេះ។​

ឯកឧត្តមបញ្ជាក់ថា ៖ «នៅក្នុងស្មារតីនេះ កម្ពុជានឹងបន្តរួមសហការជាមួយ អង្គការសហប្រជាជាតិ និងប ណ្តាប្រទេសជាមិត្ត ពង្រឹង​ពង្រីកចំណេះជំនាញ និងសក្កានុពលនៃកងកម្លាំងមួកខៀវកម្ពុជាដែលត្រូវចេញបំពេញបេសកកម្មរក្សាសន្តិភាពរបស់អង្គការសហប្រជាជាតិ ឱ្យកាន់តែមានប្រសិទ្ធភាពថែមទៀត»។ ​

ឯកឧត្តម អ៊ូច បូរិទ្ធ បានបញ្ជាក់ទៀតថា ៖ «ដូច្នេះ យោធិនម្នាក់ៗនឹងមានមោទនភាព​ខ្ពស់ ក្នុងការលើកកម្ពស់សមត្ថភាពខ្លួនរួមចំណែករក្សាសន្តិភាពនៅក្នុងក្របខ័ណ្ឌអង្គការសហប្រជាជាតិ ឱ្យកាន់តែមានប្រសិទ្ធភាពទាន់ពេលវេលានិងចំគោលដៅ និងជួយលើកស្ទួយកិត្តិយសប្រទេសជាតិយើងនៅលើឆាកអន្តរជាតិ»។ ​

​សូមបញ្ជាក់ថា គិតចាប់តាំងពីឆ្នាំ២០០៩ រហូតមកដល់បច្ចុប្បន្ននេះ ភាគីបារាំងបានឧបត្ថម្ភគាំទ្រវគ្គហ្វឹ​កហ្វឺនទាំងក្នុង និងក្រៅប្រទេសសរុបជាង ៨៤ វគ្គ ដល់សិក្ខាកាមសរុបចំនួន ១៨៥០នាក់ ហើយសិក្ខាកាមទាំងអស់សុទ្ធសឹងតែទទួលបានឱកាសចូលរួមបេសកកម្មទាំងក្នុងកងកម្លាំង និងជាទាហានសេនាធិការ និងសង្កេតការណ៍យោធាផងដែរ៕

ដោយ៖ជា សុខនី