អ.ស.ប៖ អង្គការ​ឃ្លាំ​មើល​របស់​អង្គការ​សហ​ប្រជាជាតិ​បានឱ្យដឹងថា សំណើរបស់​ប្រទេស​ជប៉ុន​ក្នុង​ការ​បញ្ចេញ​ទឹក​សំណល់​ចេ ញពី​រោងចក្រ​នុយក្លេអ៊ែរហ្វ៊ូគូស៊ីម៉ា (Fukushima) ​ចូល​ទៅ​ក្នុង​មហាសមុទ្រ ​មានលក្ខណៈស្រប​តាម​ស្តង់ដារ​អន្តរជាតិ។ ទីភ្នាក់ងារថាមពលអាតូមិកអន្តរជាតិ ឬហៅកាត់ថា​ IAEA បានបញ្ជាក់ថា ការបញ្ចេញកាកសំណល់នេះនឹងមានផលប៉ះពាល់ទៅលើបរិស្ថានតិចតួចប៉ុណ្ណោះ។

គួរដឹងដែរថា រោងចក្រហ្វ៊ូគូស៊ីម៉ា កំពុង​ខ្វះខាតទីកន្លែងសម្រាប់​ផ្ទុក​ទឹកសំណល់ជាច្រើន ដែលទឹកទាំងនោះ​ត្រូវ​បាន​គេ​ប្រើប្រាស់​សម្រាប់​ធ្វើ​ឲ្យ​ម៉ាស៊ីន​ប្រតិកម្ម​នុយក្លេអ៊ែរចុះ​ត្រជាក់។ ដោយឡែក សំណើរបស់ប្រទេសជប៉ុន ត្រូវបានបដិ​សេធដោយប្រទេសចិន និងកូរ៉េខាងត្បូង។ យ៉ាងណាមិញ ទីក្រុងតូក្យូមិនទាន់បានប្រកាសពីកាលវិភាគសម្រាប់ការបញ្ចេ​ញទឹកសំណល់នោះទេ ហើយផែនការនេះទៀតសោត ក៏ត្រូវការការយល់ព្រមពីនិយតករផងដែរ។

គួររំឭកថា កាលពីឆ្នាំ២០១១ រលកយក្សស៊ូណាមិ ដែលបង្កឡើងដោយសារការរញ្ជួយដីកម្រិត ៩,០ រិចទ័របានជន់លិចម៉ាស៊ីនរ៉េអាក់ទ័រចំនួន ៣ គ្រឿងរបស់រោងចក្រថាមពលនុយក្លេអ៊ែរហ្វ៊ូគូស៊ីម៉ា។ វាត្រូវបានគេចាត់ទុកថាជាគ្រោះមហន្តរាយនុយក្លេអ៊ែរដ៏អាក្រក់បំផុតរបស់ពិភពលោក។នេះបើគិតចាប់តាំងពីគ្រោះមហន្តរាយឆឺណូប៊ីល (Chernobyl)។ កាលនោះផងដែរ មនុស្សជាង ១៥០.០០០ នាក់ត្រូវបានជម្លៀសចេញពីតំបន់ជុំវិញរោងចក្រនេះ។ ការ​រុះរើ​រោងចក្រ​ក៏​បាន​ចាប់​ផ្តើមផង​ដែរ ប៉ុន្តែ​ដំណើរការរុះរើនេះ​អាច​ត្រូវចំណាយ​ពេល​ជាច្រើន​ទសវត្សរ៍។​

កាលពីថ្ងៃអង្គារ ប្រធាន IAEA លោក រ៉ាហ្វែល ហ្គ្រោស៊ី (Rafael Grossi) បានចេញផ្សាយការរកឃើញបន្ទាប់ពីបានត្រួ​តពិនិត្យសុវត្ថិភាពរយៈពេលពីរឆ្នាំ ដោយអះអាងថា ការអនុញ្ញាតឱ្យបញ្ចេញទឹកសំណល់នេះ មិនមែនជាការលំអៀងនោះទេ ប៉ុន្តែជាការផ្អែកលើវិទ្យាសាស្ត្រសុទ្ធសាធ។ លោក​ក៏​បាន​ប្តេជ្ញា​ថា​នឹង​បន្ត​ចូលរួមធ្វើការ​ជាមួយ​ប្រទេស​ជប៉ុន ​បន្ទាប់​ពី​ទឹក​ត្រូវ​បាន​ទំលាយចេញ។​

កាលពីខែឧសភា កន្លងទៅ ទីភ្នាក់ងារនេះធ្លាប់បានប្រាប់ឱ្យដឹងថា ប្រតិបត្តិករហ្វ៊ូគូស៊ីម៉ាដែលជាក្រុមហ៊ុនថាមពលអគ្គិសនីតូក្យូ (Tokyo Electric Power) បានបង្ហាញសមត្ថភាពវាស់វែងបានយ៉ាងត្រឹមត្រូវ និងច្បាស់លាស់ ពោលគឺវាស់វែងទៅលើបរិមាណវិទ្យុសកម្មដែលមាននៅក្នុងទឹកសំណល់នោះ។ ចំពោះការអនុម័តចុងក្រោយពីក្រុមហ៊ុនថាមពលអគ្គិសនីនេះ អាចនឹងធ្វើឡើងនៅក្នុងសប្តាហ៍នេះ។​

គួរបញ្ជាក់ថា រោងចក្រនុយក្លេអ៊ែរនេះ បានផលិតទឹកសំណល់រហូតដល់ទៅ ១០០ ម៉ែត្រគូបក្នុងមួយថ្ងៃ។​ ដោយឡែក ធុងស្តុកទឹកសំណល់នៅនឹងកន្លែងអាចផ្ទុកបាន ១,៣ លានម៉ែត្រគូប។ ធាតុវិទ្យុសកម្មភាគច្រើនត្រូវបានច្រោះចេញពីទឹក លើកលែងតែទម្រង់វិទ្យុសកម្មនៃអ៊ីដ្រូសែន និងកាបូន ដែលហៅថាទ្រីទីយ៉ូម និងកាបូន ១៤។

ក្រុងតូក្យូ​បានប្រកាស​ថា ទឹក​ដែល​នឹង​បញ្ចេញ​ទៅ​ក្នុង​មហាសមុទ្រ​ប៉ាស៊ីហ្វិក ដែល​នឹងត្រូវលាយឡំជាមួយ​នឹង​ទឹក​សមុទ្រ ​មាន​កម្រិតទ្រីទីយ៉ូម និង​កាបូន ១៤ ត្រឹម​ត្រូវ​តាម​ស្តង់ដារ​សុវត្ថិភាព។ ជាក់ស្ដែង រោងចក្រផលិតថាមពលនុយក្លេអ៊ែរនៅជុំវិញពិភពលោកតែងតែបញ្ចេញទឹកសំណល់ដែលមានកម្រិតទ្រីទីយ៉ូមលើសពីរោងចក្រហ្វូគូស៊ីម៉ាទៅទៀត។​

ប៉ុន្តែ​ការ​រក​ឃើញ​របស់ IAEA មិនអាច​សម្រាល​កង្វល់​របស់​ប្រជាពលរដ្ឋជប៉ុននោះទេ ជាពិសេស​គឺបណ្ដាប្រទេស​ជិត​ខាង។ កន្លងមក ប្រទេសចិន​បាន​រិះគន់​យ៉ាង​ខ្លាំងទៅ​លើ​ផែនការ​របស់​ជប៉ុន ហើយ​បាន​ព្រមាន IAEA និងប្រឆាំង​ដាច់ខាតចំពោះការអនុញ្ញាតរបស់ទីភ្នាក់ងារមួយនេះ។

ម្យ៉ាងវិញទៀត ប្រជាជនកូរ៉េខាងត្បូងបាននាំគ្នាស្តុកទុកអំបិលដែលចម្រាញ់ចេញពីទឹកសមុទ្រនៅមុនការទំលាយទឹកសំណល់ ដោយសារតែពួកគេមានការព្រួយបារម្ភអំពីសុវត្ថិភាពចំណីអាហារ។ រីឯសហគមន៍នេសាទក្នុងស្រុក ក៏បានជំទាស់ផងដែរ ដោយនិយាយថា វានឹងធ្វើឱ្យខូចកេរ្តិ៍ឈ្មោះរបស់ពួកគេ៕​

ប្រែសម្រួល៖ធា សុណា

ប្រភព​៖ BBC News Fukushima nuclear disaster: UN watchdog approves plan for water release