ថៃ រំពឹងថានឹងមាននាយករដ្ឋមន្ត្រីថ្មី ក្រោយសម័យប្រជុំសភាចំនួនបីលើកនៅខែកក្កដានេះ
ថៃ៖ អនុប្រធានសភាជាប់ឆ្នោតថៃ លោក ពីជិត ចៅមូអង់ផាន(Pichet Chuamuangphan) បាននិយាយនៅថ្ងៃព្រហស្បតិ៍នេះថា ថៃរំពឹងថានឹងមាននាយករដ្ឋមន្រ្តីឡើងកាន់តំណែងថ្មី ក្រោយសម័យប្រជុំរួមគ្នានៃសភាតំណាងរាស្រ្ត និងព្រឹទ្ធសភាចំនួនបីលើកដំបូង ដែលគ្រោងនឹងធ្វើឡើងក្នុងខែកក្កដានេះ។ នេះបើតាមការចុះផ្សាយរបស់កាសែតបាងកកប៉ុស្តិ៍។
ការឱ្យដឹងយ៉ាងដូច្នេះ ធ្វើឡើងបន្ទាប់ពីប្រធានសភាថៃថ្មីថ្មោង លោក វ៉ាន់ មូហាមេដ នូ ម៉ាថា(Wan Muhamad Noor Matha )បានប្រាប់អ្នកសារព័ត៌មានកាលពីថ្ងៃពុធថា សភាថៃត្រៀមខ្លួនសម្រាប់សម័យបោះឆ្នោតជ្រើសរើសនាយករដ្ឋមន្ត្រីថ្មី ដែលគ្រោងនឹងធ្វើឡើងនៅថ្ងៃទី១៣ កក្កដាខាងមុខ។
លោក Pichet បាននិយាយថា សម័យប្រជុំចំនួនបីនោះ នឹងធ្វើឡើងនៅថ្ងៃទី ១៣, ១៩ និង ២០ ខែកក្កដានេះ ហើយរយៈពេលនេះ នឹងអាចផ្តល់ពេលវេលាគ្រប់គ្រាន់សម្រាប់ការបោះឆ្នោតជ្រើសរើសនាយករដ្ឋមន្ត្រីថ្មី។
គួរបញ្ជាក់ថា រហូតមកទល់ពេលនេះ តំណែងនាយករដ្ឋមន្រ្តីបន្ទាប់កំពុងស្ថិតនៅក្នុងភាពស្រពិចស្រពិលនៅឡើយ។ ក្រោមរដ្ឋធម្មនុញ្ញថៃ ទោះបីជាគណបក្សចលនាឆ្ពោះទៅមុខ (MFP) របស់លោក ភីតា លីមចារ៉នរ៉ាត ឈ្នះការបោះឆ្នោតនាំមុខគេក្ដី ក៏លោកត្រូវការសំឡេងគាំទ្រយ៉ាងតិច៣៧៦ សំឡេង ពីសភាទាំងពីររបស់ប្រទេស ដើម្បីក្លាយជានាយករដ្ឋមន្រ្តី និងបង្កើតរដ្ឋាភិបាលថ្មី។
ទន្ទឹមនេះសម្ព័ន្ធគណបក្សនយោបាយចម្រុះចំនួនប្រាំបីរបស់លោក លោក ភីតា ដែលបង្កើតឡើងក្រោយការបោះឆ្នោត អាចផ្ដល់សំឡេងគាំទ្រពីសមាជិកសភាត្រឹមតែ ៣១២ សំឡេងប៉ុណ្ណោះ ។មានន័យថា លោកត្រូវការសំឡេងគាំទ្រពីសមាជិកព្រឹទ្ធសភាយ៉ាងតិច ៦៤ សំឡេងទៀត ដើម្បីក្លាយជានាយករដ្ឋមន្រ្តី។ ហើយការប្រជុំសភាខាងមុខទាំង៣លើកនេះ នឹងកំណត់ជោគវាសនារបស់លោក។
ដោយហេតុនេះហើយ លោក Pichet បាននិយាយបន្តនៅថ្ងៃព្រហស្បតិ៍នេះថា៖ «ការបោះឆ្នោតដំបូងឡើយ កំណត់ថានឹងធ្វើឡើងនៅថ្ងៃទី ១៣ ខែកក្កដា ប៉ុន្តែប្រសិនបើវាបរាជ័យ យើងនឹងមានសម័យបោះឆ្នោតលើកទី២នៅថ្ងៃទី ១៩ ខែកក្កដា ឬលើកទី៣ នៅថ្ងៃទី ២០ ខែកក្កដា។ ខ្ញុំគិតថាបីថ្ងៃគួរតែគ្រប់គ្រាន់ហើយដើម្បីជ្រើសរើសនាយករដ្ឋមន្រ្តី»។
នៅពេលចោទសួរថាតើគណបក្សភឿថៃ នឹងដឹកនាំក្រុមចម្រុះឬយ៉ាងណា ប្រសិនបើសម័យប្រជុំទាំង៣លើកមិនអាចសម្រេចឱ្យលោក ភីតា ក្លាយជានាយករដ្ឋមន្ត្រីនោះ លោក Pichet បានឆ្លើយថា វានឹងអាស្រ័យលើសភា និងគណបក្សចម្រុះទាំងចំនួន៨។
លោក Pichet បានបញ្ជាក់ថា៖ «គណបក្សចម្រុះទាំងប្រាំបីនឹងគោរពតាមអនុស្សរណៈនៃការយោគយល់គ្នារបស់ពួកគេ ដោយបន្តនៅរួមគ្នា។ គេនឹងមានការពិភាក្សាផ្ទៃក្នុង ហើយនឹងមិនមានបញ្ហាអ្វីនោះទេ»។
ជាមួយគ្នានេះផងដែរ អនុប្រធានសភាដដែលបាននិយាយថា លោកមិនប្រាកដថាមានសមាជិកព្រឹទ្ធសភាប៉ុន្មានរូបនឹងបោះឆ្នោតជូនលោក ភីតា នោះទេ ប៉ុន្តែបានបង្ហើបថា លោកបាននិយាយជាមួយសមាជិកព្រឹទ្ធសភាមួយចំនួន ដែលបង្ហាញការគាំទ្រចំពោះលោក ភីតា ក្នុងការបង្កើតរដ្ឋាភិបាលថ្មីសម្រាប់ការអភិវឌ្ឍជាតិ៕
ប្រែសម្រួលដោយ៖ ហួន ឌីណា ប្រភព៖ New PM expected within 3 parliament sessions