ហាណូយ៖ ក្រុមហ៊ុនអាកាសចរណ៍ជាតិវៀតណាម Vietnam Airlines (VNA) បានប្រកាសថា ខ្លួននឹងបណ្តេញអ្នកបើកយន្តហោះម្នាក់ចេញពីការងារ ក្រោយលទ្ធផលតេស្តសុខភាពបង្ហាញថាមានសារធាតុញៀន។

លោក ដាំង អាញ់ ទន់(Dang Anh Tuan) អគ្គនាយករង និងជាអ្នកនាំពាក្យរបស់ VNA បាននិយាយកាលពីថ្ងៃពុធថា ពីឡុតយន្តហោះ ដែលមានឈ្មោះកាត់ P.H.D. វ័យ ៣៦ ឆ្នាំ ត្រូវបានព្យួរពីការងារ ហើយនឹងត្រូវបណ្តេញចេញពីការងារ ក្រោយលទ្ធផលតេស្តសុខភាពរបស់លោកបង្ហាញថា លោកមានផ្ទុកសារធាតុញៀន។នេះបើតាមការចុះផ្សាយរបស់កាសែតវៀតណាម ទួយ ត្រែ(Tuoi Tre)។

លោក ទន់ បានឱ្យដឹងទៀតថា VNA បានរាយការណ៍ករណីនេះទៅអាជ្ញាធរអាកាសចរណ៍ស៊ីវិលវៀតណាម (CAAV) ដោយបញ្ជាក់ថា សំណាកឈាម និងទឹកនោមរបស់លោក P. មានជាតិថ្នាំកេតាមីន ដូចដែលបានបង្ហាញនៅក្នុងរបាយការណ៍ធ្វើតេស្តពីមន្ទីរពេទ្យទូទៅ Medlatec ក្នុងទីក្រុងហាណូយ។

អ្នកនាំពាក្យដដែលបន្តថា VNA បាននិងកំពុងអនុវត្តនីតិវិធីដើម្បីដោះស្រាយលើការបំពានរបស់លោក P. តាមរយៈចំណាត់ការវិន័យដ៏ធ្ងន់ធ្ងរបំផុត។ លោកបន្ថែមថា៖ «អ្នកបំពានគ្រប់រូប ត្រូវតែទទួលទោសយ៉ាងតឹងរ៉ឹង»។

គួររំឭកថា នៅថ្ងៃទី ២៥ ខែមេសា បន្ទាប់ពីបដិសេធមិនធ្វើតេស្តរកសារធាតុថ្នាំមុនពេលហោះហើរនៅស្ថានីយ៍វេជ្ជសាស្រ្តរបស់អាកាសចរណ៍ លោក P. ត្រូវបានគេនាំខ្លួនទៅធ្វើតេស្ត ដោយលទ្ធផលបង្ហាញថា លោកមានផ្ទុកសារធាតុកេតាមីន។ លោកបានអះអាងក្រោយមកទៀតថា មុនពេលធ្វើតេស្តនោះ លោកបានប្រើថ្នាំបំបាត់ការឈឺចាប់ចំនួនពីរ (Ultracet និង Efferalgan Codeine) ដោយគ្មានវេជ្ជបញ្ជាពីពេទ្យ។

ប៉ុន្តែកាលពីថ្ងៃទី ០៧ ខែកក្កដា មជ្ឈមណ្ឌលវេជ្ជសាស្ត្រអាកាសចរណ៍របស់ CAAV បានចេញរបាយការណ៍មួយដែលបញ្ជាក់ថា សារធាតុហាមឃាត់ដែលរកឃើញក្នុងសំណាករបស់លោក P. មិនពាក់ព័ន្ធនឹងការប្រើប្រាស់ថ្នាំបំបាត់ការឈឺចុកចាប់ដូចលោកនិយាយនោះទេ។ មជ្ឈមណ្ឌលបានអះអាងថា សារធាតុសកម្មនៅក្នុងថ្នាំទាំងពីរ មិនដូចគ្នាទៅសារធាតុរបស់ថ្នាំកេតាមីន នោះទេ។

មន្រ្តីម្នាក់មកពី CAAV បានប្រាប់កាសែត ទួយ ត្រែកាលពីថ្ងៃពុធថា ពីឡុតយន្តហោះណាដែលរកឃើញថាបានប្រើប្រាស់គ្រឿងញៀន នឹងត្រូវដកហូតអាជ្ញាប័ណ្ណអ្នកបើកបរយន្តហោះជាអចិន្ត្រៃយ៍។

គួរបញ្ជាក់ថា ព័ត៌មានលម្អិត រួមមានអត្តសញ្ញាណរបស់លោក P. ដូចជាឈ្មោះពេញ មិនត្រូវបានបញ្ចេញជាសារធារណៈនោះទេ។ ប៉ុន្តែ Tuoi Tre ផ្សាយថា លោកធ្លាប់ជាតារាសម្តែងក្មេង ដ៏ល្បីមួយរូប ដែលបានលេចមុខក្នុងរឿងភាគទូរទស្សន៍វៀតណាមជាច្រើន។ ក្រោយមកនៅពេលពេញវ័យ លោកបានបោះបង់អាជីពសម្ដែង ហើយបន្តអាជីពថ្មីជាអ្នកបើកបរយន្តហោះ៕ ប្រែសម្រួលដោយ៖ ហួន ឌីណា