នូវែលសេឡង់៖ ក្នុងសុន្ទរកថាទៅកាន់កិច្ចប្រជុំកំពូលធុរកិច្ចចិននៅទីក្រុងអូកឡិន នូវែលសេឡង់ នាថ្ងៃ​ទី១៧ ខែកក្កដានេះ នាយករដ្ឋមន្ត្រីនូវែលសេឡង់ លោក Chris Hipkins បាននិយាយថា តំបន់ប៉ាស៊ីហ្វិកកាន់តែមានការប្រ​កួតប្រជែងឥទ្ធិពលខ្លាំងឡើងៗ និងមិនសូវមានសុវត្ថិភាពប៉ុន្មានទេ តាមរយៈវត្តមានប្រទេសចិនកាន់តែច្បា​ស់ឡើងៗ។ទោះយ៉ាងណានាយករដ្ឋមន្ត្រីនូវែលសេឡង់បញ្ជាក់ថា ប្រទេសទាំងពីរត្រូវធ្វើការដូចដៃគូចិត្តមួយថ្លើមមួយ និងនៅតែរក្សាទំនាក់ទំនងជាមួយទីក្រុងប៉េកាំង។

លោក Chris Hipkins បាននិយាយថា ការរះត្រដែតឡើងនូវ​វត្តមានរបស់ប្រទេសចិន និងរបៀបប្រទេសមួ​យនេះស្វែងរកឥទ្ធិពលក្នុងតំបន់ គឺជាកត្តាដ៏សំខាន់ដែលជះឥទ្ធិពលដល់ការបង្កើនការប្រកួតប្រជែង យុ​ទ្ធ​សាស្រ្ត ជាពិសេសនៅក្នុងឥណ្ឌូប៉ាស៊ីហ្វិក។

លោកបាន​​បញ្ជាក់​ថា ​៖ «​តំបន់​របស់​យើង​មាន​ការ​ប្រកួត​ប្រជែង​ឥទ្ធិពលកាន់​តែ​ខ្លាំងឡើងៗ​ ពិបាកក្នុងការព្យា​ករ​ និង​មិន​សូវ​មាន​សុវត្ថិភាព​ ហើយវាអាចបង្កបញ្ហាប្រឈមសម្រាប់ប្រទេសតូចដូចជានូវែលសេឡង់ ដែ​លពឹងផ្អែកលើស្ថិរភាព និងច្បាប់អន្តរជាតិ ដើម្បីភាពរុងរឿង និងសន្តិសុខជាតិ»។

លោកបានសង្កត់ធ្ងន់ថា នៅក្នុងបរិយាកាសដ៏ស្មុគស្មាញនេះ ទំនាក់ទំនងរវាងប្រទេសទាំងពីរត្រូវតែគ្រ​ប់គ្រងដោយប្រុងប្រយ័ត្នបំផុត និងថាប្រទេសចិននៅតែជាដៃគូពាណិជ្ជកម្មដ៏សំខាន់សម្រាប់ខ្លួន។

គួរជម្រាបថា ចិន​បានបង្កើនឥទ្ធិពលរបស់ខ្លួននៅក្នុងតំបន់នៅ​ប៉ាស៊ីហ្វិក​ខាងត្បូង តាមរយៈការបញ្ចុះបញ្ចូល​​ឲ្យក្រុម​ប្រទេស​ដែនកោះ ពិសេសកោះសាឡូម៉ុង ចុះ​កិច្ចព្រមព្រៀង​ពាណិជ្ជកម្ម​ ​និងសន្តិសុខ​ជា​មួយ​ខ្លួន។

កិច្ចព្រមព្រៀង​សន្តិសុខ រវាងប្រទេសចិន និងកោះសាឡូម៉ុង ដែល​អនុញ្ញាត​ឱ្យ​​ចិនបញ្ជូន​កងទ័ព និង​នាវាចម្បាំង​ទៅ​ចត​នៅ​ប្រទេស​កោះសាឡូម៉ុង ​បានធ្វើ​ឱ្យអាមេរិក និង​ប្រទេសមួយចំនួន​នៅ​មហាសមុទ្រ​ប៉ាស៊ីហ្វិក ជាពិសេស អូស្ត្រាលី ហាក់មិនស្រណុកចិត្តឡើយ។

ដោយឡែកសម្រាប់ នូវែលសេឡង់ ប្រទេសចិនគឺជាដៃគូពាណិជ្ជកម្មធំជាងគេបង្អស់របស់ខ្លួន​ ហើយក្នុងចំ​ណោមប្រទេសសម្ពន្ធភាព Five Eyes ដែលមានសមាជិកដូចជាអាមេរិក អង់គ្លេស កាណាដា នូវែលសេឡង់ និងអូស្ត្រាលី។ នូវែលសេឡង់ គឺជាប្រទេសមួយដែលហាក់ប្រកាន់ជំហរទន់ភ្លន់ជាងគេក្នុងទំនាក់ទំន​ងជាមួយចិន។

ថ្លែងក្នុងសុន្ទរកថា នៅឯកិច្ចប្រជុំកំពូលធុរកិច្ចចិនក្នុងទីក្រុងអូកឡិន នេះដែរលោក Wang Xiaolong ឯកអគ្គរដ្ឋទូតចិនប្រចាំប្រទេសនូវែលសេឡង់បាននិយាយ ទំនាក់ទំនង ចិន និងនូវែលសេឡង់មានសុខភាពល្អ ស្ថិរភាព និងភាពរីកចម្រើន។

លោក Wang Xiaolong បន្តថា វាមិនមែនជារឿងចម្លែកទេដែលប្រទេសពីរមានភាពខុសគ្នាខ្លះ ភាពខុសគ្នាគឺធ្វើស្របទៅតាមកាលៈទេសៈរបស់ប្រទេសរៀងៗខ្លួន។ ប្រទេស​ពីរ​ដែល​មាន​ប្រព័ន្ធ​សង្គម​ខុស​គ្នា និង​កម្រិត​នៃ​ការ​អភិវឌ្ឍផ្សេងគ្នា​មិន​អាចដូចគ្នាបាននោះ​ទេ៕​

ដោយ៖ស្រ៊ុន សិរីវឌ្ឍនៈ

ប្រភព៖ New Zealand prime minister says Pacific region less secure due to China’s assertiveness