ទំព័រដើមហោរាសាស្ត្រឆ្នាំទាំង៤ជូត ឆ្លូវ មមី វក រាសីឡើងខ្ពស់ត្រដែតលោកអ្នកជាម្ចាស់នៃភោគទ្រព្យសម្ប...

ឆ្នាំទាំង៤ជូត ឆ្លូវ មមី វក រាសីឡើងខ្ពស់ត្រដែតលោកអ្នកជាម្ចាស់នៃភោគទ្រព្យសម្បត្តិ និងតំណែងការងារល្អសម្រាប់ជីវិតថ្ងៃនេះ

ហោរាសាស្រ្តប្រចាំថ្ងៃសៅរ៍ ទី២៦ ខែធ្នូ ឆ្នាំ២០២០ ត្រូវនឹងថ្ងៃ១២ កើត ខែបុស្ស ឆ្នាំជូត ទោស័ក ពស​២៥៦៤

ឆ្នាំជូត

សម្រាប់លោកអ្នកដែលកើតឆ្នាំជូត នាមសត្វកណ្តុរ ធាតុទឹក ពង្សទេវតាប្រុស។ រាសីអស់លោកអ្នកថ្ងៃនេះឡើងខ្ពស់ត្រដែត។ មុខរបរអាជីវកម្ម និងកិច្ចការដែលអ្នកកំពុងធ្វើនឹងមានតែភាពចម្រើនលូតលាស់ណាស់ ចំណែកប្រាក់កាសក៏ហូរចូលមិនដាច់។ ថ្ងៃនេះគ្មានអ្វីអាចបង្អាក់មុខរបរការងារ និងអាជីវកម្មរបស់លោកអ្នកបានឡើយ។ បើអ្នកសម្រេចចិត្តបង្កើតមុខរបរការងារថ្មី ឬធ្វើការបណ្តាក់ទុន សូមកុំភ័យខ្លាច និងបារម្ភអ្វីឡើយព្រោះនឹងអាចសម្រេចទៅដោយជោគជ័យ។ សូមកុំភ្លេចមានចិត្តសណ្តោសប្រណី ដល់មនុស្សទន់ខ្សោយ។ សម្រាប់ទំនាក់ទំនងសេ្នហា គូស្នេហ៍ស្គាល់តែភាពសុខដុមរមនា។

ឆ្នាំឆ្លូវ

សម្រាប់លោកអ្នកដែលមានកំណើតឆ្នាំឆ្លូវ នាមសត្វគោ ធាតុដី ពង្សមនុស្សប្រុស។ រាសីអស់លោកអ្នកនៅក្នុងថ្ងៃនេះឡើងខ្ពស់ត្រដែត។ លាភសំណាងជាប្រាក់កាសជាច្រើននឹងធ្លាក់ដល់ដៃលោកអ្នកដែលប្រកបអាជីវកម្ម​​ ចំណែកអ្នកធ្វើការងាររដ្ឋឯកជននឹងបានសម្រេចគម្រោងការងារដែលបានដាក់ចេញ ម្យ៉ាងមុខតំណែងការងារល្អៗនឹងមកដល់ផងដដែរ។ លោកអ្នកអាចសម្រេចចិត្តរៀបចំពិធីមង្គលផ្សេងៗបាន ដោយមិនមានផលរំខានអ្វីទេ។ សូមបង្កើនទំនាក់ទំនងល្អបន្ថែម។ សម្រាប់អ្នកមិនទាន់មានគូ លោកអ្នកនឹងជួបមនុស្សដែលអាចពឹងពាក់អាស្រ័យទៅថ្ងៃខាងមុខបាន។

ឆ្នាំខាល

សម្រាប់លោកអ្នកដែលមានកំណើតឆ្នាំខាល នាមសត្វខ្លា ធាតុឈើ ពង្សយក្សស្រី។  រាសីអស់លោកអ្នកក្នុងថ្ងៃនេះល្អជាមធ្យម។ លោកអ្នកនឹងមានមនុស្សជាច្រើនចាំគាំទ្រ និងជួយយកអាសារក្នុងកិច្ចការងារនានា។ ប៉ុន្តែសូមកុំជឿទុកចិត្តមនុស្សដែលមានកំណើតឆ្នាំកុរ។ ទន្ទឹមនឹងនោះដែរ សូមកុំទាន់សម្រេចចិត្តផ្លាស់ប្តូរកិច្ចការងារនៅពេលនេះ ព្រោះអ្វីៗមិនទាន់ប្រាកដទាំងស្រុងទេ។ អ្នកត្រូវធ្វើជាមនុស្សទឹក ការច្រណែនឈ្នានីសមិនល្អទេ ចូររស់នៅបែបស្ងប់ស្ងាត់និងធម្មតា។ សម្រាប់កំឡោះក្រមុំ អ្នកអាចសាងទំនាក់ទំនងសេ្នហាបាន។

ឆ្នាំថោះ

សម្រាប់លោកអ្នកដែលមានកំណើតឆ្នាំថោះ នាមសត្វទន្សាយ ធាតុឈើ ពង្សមនុស្សស្រី។  រាសីអស់លោកអ្នកថ្ងៃនេះល្អជាមធ្យម។ មុខរបររកស៊ីជួញដូរ និងការងាររបស់លោកអ្នកនឹងទទួលបានភាពកាក់កបណាស់​ ម្យ៉ាងទៀតអ្នកមានមនុស្សជុំវិញសុទ្ធតែជាមនុស្សដែលអាចពឹងពាក់បាន ប៉ុន្តែលើកលែងមនុស្សដែលមានកំណើតឆ្នាំរកា។ អ្នកអាចផ្លាស់ប្តូរកិច្ចការងារ ប្រសិនបើអ្នកគ្មានទំនុកចិត្ត។ កុំពាក់ព័ន្ធបញ្ហារបស់អ្នកដទៃ ហើយជៀសពីជម្លោះ ពិសេសក្នុងការិយាល័យ។ ការធ្វើដំណើរសូមប្រយ័ត្នប្រយែងឲ្យបានខ្ពស់។ ដោយឡែក គូស្នេហ៍ស្គាល់តែភាពរីករាយនឹងគ្នា។

ឆ្នាំរោង

សម្រាប់លោកអ្នកដែលមានកំណើតឆ្នាំរោង នាមសត្វនាគ ធាតុមាស ពង្សទេវតាប្រុស។​ រាសីអស់លោកអ្នកថ្ងៃនេះល្អជាមធ្យម។ លាភសំណាង និងមុខតំណែងការងារនឹងទទួលបានដំណឹងនៅថ្ងៃនេះ ប៉ុន្តែសូមប្រយ័ត្នពាក្យសំដី។ ហោរាតម្រូវឲ្យលោកអ្នករក្សាចិត្ត​ស្ងប់ អនុគ្រោះ និងរស់នៅដោយមិនប្រមាទចំពោះហេតុការណ៍នានា។ លោកអ្នកមិនគួរជឿទុកចិត្តមនុស្សដោយងាយៗនោះទេ។  ការធ្វើដំណើរផ្លូវឆ្ងាយអាចដំណើរការបាន ប៉ុន្តែសូមប្រយ័ត្នក្នុងការបើកបរ។ សម្រាប់គូស្នេហ៍ លោកអ្នកមានភាពចុះសម្រុងគ្នាណាស់។

 ឆ្នាំម្សាញ់

សម្រាប់លោកអ្នកដែលមានកំណើតឆ្នាំម្សាញ់ នាមសត្វពស់ ធាតុភ្លើង ពង្សមនុស្សប្រុស។ រាសីអស់លោកអ្នកថ្ងៃនេះល្អជាមធ្យម។ កិច្ចការងារ និងមុខរបររកស៊ីនឹងទទួលបានផលចំណេញ និងអាចសម្រេចផលបានយ៉ាងគាប់ចិត្ត។ ប៉ុន្តែសូមប្រយ័ត្នក្នុងការចាយវាយ ដើម្បីកុំឲ្យមានហានិភ័យក្នុងផ្នែកសេដ្ឋកិច្ច។ ប្រសិនបើអ្នកខកបំណងជាមួយនឹងដៃគូរួមការងារ ឬមុខជំនួញជួញដូរ​ ចូររក្សាភាពស្ងប់ស្ងាត់ ហើយរៀបចំគម្រោងការងារជាថ្មីឲ្យច្បាស់លាស់។ រក្សាការសំងាត់ជាកិច្ចការដែលអ្នកត្រូវតែធ្វើ។ សម្រាប់គូស្នេហ៍ មានភាពផ្អែមល្ហែមនឹងគ្នាណាស់។

ឆ្នាំមមី

សម្រាប់លោកអ្នកដែលមានកំណើតឆ្នាំមមី នាមសត្វសេះ ធាតុភ្លើង ពង្សទេវតាសី្រ។ រាសីអស់លោកអ្នកថ្ងៃនេះឡើងខ្ពស់ត្រដែត។ អ្នកប្រកបការងារនឹងទទួលបានផលសម្រេចក្នុងគម្រោងដែលបានដាក់ចេញ​ ហើយឳកាសសម្រាប់មុខតំណែងគឺមានសញ្ញាណខ្ពស់។ ចំណែកអ្នកប្រកបអាជីវកម្មនឹងទទួលបានការគាំទ្រពីអតិថិជនល្អៗ និងផលចំណេញយ៉ាងច្រើន។ ផលលាភទាំងនេះទាក់ទងយ៉ាងជិតស្និទ្ធនឹងអាកប្បកិរិយាល្អរបស់អ្នក។ លោកអ្នកអាចនឹងត្រូវគេនាំរឿងមកឲ្យ ដូច្នេះសូមជៀសឲ្យឆ្ងាយ វាគ្មានប្រយោជន៍អ្វីសោះដល់អ្នកទេ។ ទំនាក់ទំនងស្នេហា ស្គាល់តែភាពរីករាយ។

ឆ្នាំមមែ

សម្រាប់លោកអ្នកដែលមានកំណើតឆ្នាំមមែ នាមសត្វពពែ ធាតុមាស ពង្សទេវតាសី្រ។ រាសីអស់លោកអ្នកថ្ងៃនេះល្អជាមធ្យម។ មុខរបរអាជីវកម្ម និងការងារនានារបស់លោកអ្នកនឹងអាចសម្រេចផលបានជាទីគាប់ចិត្ត។ សូមកុំមានចិត្តស្ទាក់ស្ទើរ ចូរចាប់យកឳកាសនានាដែលមាននៅក្នុងថ្ងៃនេះ។ សូមធ្វើទំនាក់ទំនងជាមួយមនុស្សផ្ទុយភេទដែលមកពីឆ្ងាយ ព្រោះគេនឹងនាំសំណាងស្ថិតស្ថេរដល់អ្នក។ ចូរត្រៀមខ្លួនទប់ស្កាត់នឹងបញ្ហាតូចតាចនានាដែលនាំកង្វល់ដល់ជីវិតអ្នក។ ដោយឡែកគូស្នេហ៍មានការអធ្យាស្រ័យ និងយោគយល់គ្នាល្អណាស់។

ឆ្នាំវក

សម្រាប់លោកអ្នកដែលមានកំណើតឆ្នាំវក នាមសត្វស្វា ធាតុដែក ពង្សយក្សប្រុស។ រាសីលោកអ្នកថ្ងៃនេះឡើងខ្ពស់ត្រដែត។ កិច្ចការងារ និងរបររកស៊ីជួញដូរទទួលបានជោគជ័យយ៉ាងខ្លាំង ចំណែកភោគទ្រព្យហូរចូលផ្ទះមិនដាច់។ អ្នកអាចសម្រេចចិត្តធ្វើការងារសំខាន់បាន ព្រោះពាក្យសំដីអ្នកនឹងមានអ្នកជឿទុកចិត្តជាច្រើន។ កុំខ្លាចក្នុងការបណ្តាក់ទុន ឬជ្រើសរើសមុខតំណែងថ្មី។ លោកអ្នកអាចរៀបពិធីរៀបអាពាហ៍ពិពាហ៍ និងឡើងគេហដ្ឋានបានប្រសើរណាស់។ សូមរក្សាគំលាតពីមនុស្សកើតថ្ងៃពុធ ឆ្នាំមមី។ ចំពោះគូស្នេហ៍ ល្អូកល្អឺននឹងគ្នា លោកអ្នកអាចទទួលបានកំណើតបុត្រាបុត្រីផងដែរ។

ឆ្នាំរកា

សម្រាប់លោកអ្នកដែលមានកំណើតឆ្នាំរកា នាមសត្វមាន់ចែ ធាតុដែក ពង្សយក្សប្រុស។ រាសីអស់លោកអ្នកល្អជាមធ្យម។ លោកអ្នកដែលប្រកបរបរជួញដូរនឹងទទួលបានកម្រៃចំណេញទ្វេរគុណ។ សម្រាប់បុគ្គលិកកម្មករនឹងទទួលបានឳកាសការងារដ៏ប្រសើរជាងមុន ព្រមទាំងបានទទួលការគាំទ្រយ៉ាងខ្លាំងពីសំណាក់មិត្តរួមការងារ។ ចូរប្រុងប្រយ័ត្នពាក្យសំដី អាកប្បកិរិយាច្រងេងច្រងាង ការមើលងាយស្ថានការណ៍ និងកុំទាក់ទងមនុស្សឆ្នាំថោះ។ សូមកុំទាន់សម្រេចចិត្តធ្វើការងារថ្មី រងចាំឳកាសបន្តិចទៀតសិន ពីព្រោះភាពអវិជ្ជមានស្ថិតក្នុងខ្សែបណ្តោយជាមួយសំណាងនៅឡើយ។ ចំណែកគូស្នេហ៍ មានការអធ្យាស្រ័យគ្នាបានល្អណាស់។

ឆ្នាំចរ

សម្រាប់លោកអ្នកដែលមានកំណើតឆ្នាំចរ នាមសត្វឆ្កែ ធាតុដី ពង្សយក្សស្រី។ រាសីអស់លោកអ្នកនៅក្នុងថ្ងៃនេះល្អជាមធ្យម។ កិច្ចការរកស៊ីជួញដូរដំណើរការទៅជាប្រក្រតី និងមិនមានផលរំខានអ្វីឡើយ។ សូមអ្នករៀបចំគម្រោងការងារជាថ្មី ដោយត្រូវត្រៀមចំពោះហានិភ័យដែលនឹងអាចកើតឡើងដោយចៃដន្យ។ លាក់ការសំងាត់ ពាក្យសំដីដែលគ្មានប្រយោជន៍មិនគួរនិយាយសោះឡើយ។ កុំធ្វើការងារធំដុំជាមួយកើតថ្ងៃអង្គារ។ ការរៀបចំពិធីមង្គលនានាគួរចាប់ផ្តើមនៅពេលរសៀល។ សម្រាប់ទំនាក់ទំនងជាមួយមនុស្សជាទីស្រលាញ់ មានដំណើរការយ៉ាងល្អប្រសើរ។

ឆ្នាំកុរ​

សម្រាប់លោកអ្នកដែលមានកំណើតឆ្នាំកុរ  នាមសត្វជ្រូក ធាតុទឹក ពង្សមនុស្សស្រី។ រាសីអស់លោកអ្នកនៅក្នុងថ្ងៃនេះល្អជាមធ្យម។ កិច្ចការរបស់លោកអ្នកប្រព្រឹត្តិទៅដោយរលូន និងគ្មានហេតុជំទាស់ឡើយ។ ប៉ុន្តែសូមផ្អាកការផ្លាស់ប្តូរសិនទើបជាការប្រសើរជាង។ កំហុសតិចតួចអាចកើតឡើង ប៉ុន្តែសូមដោះស្រាយដោយសន្តិវិធី និងយោគយល់។ ទិសភោគផលធំរបស់អ្នក គឺទិសនិរតី ហើយមនុស្សដែលអាចជួយជ្រោមជ្រែងអ្នកបាន មានកំណើតឆ្នាំវក។ សម្រាប់ទំនាក់ទំនងស្នេហាកំឡោះក្រមុំ សញ្ញាណនៃចម្លើយដ៏រីករាយនឹងមានដល់អ្នក។

រៀបរៀងដោយ៖ កញ្ញា មាស សុភាព

- Advertisement -spot_img

អត្ថបទជាប់ទាក់ទង

អត្ថបទផ្សេងទៀត

- Advertisement -spot_img

បណ្ដាញសង្គម

18,489FansLike
191,100FollowersFollow
18,200SubscribersSubscribe
- Advertisement -spot_img
error: Content is protected !!