ទំព័រដើមទំនៀមទម្លាប់បុរាណជំនឿហៅព្រលឹងសក់ក្នុងពិធីកោរជុក

ហៅព្រលឹងសក់ក្នុងពិធីកោរជុក

គេហទំព័រ អេ អឹម អេស អរិយធម៌ខ្មែរ (AMS Khmer Civilization) យើងខ្ញុំធ្លាប់បាន​ចុះ​ផ្សាយ​អំពី​ពិធី “កោរជុក” ម្តងរួច​មក​ហើយ។ នៅក្នុងពិធីកោរជុក មានកិច្ចច្រើន​ណាស់​ដែល​​ត្រូវ​ប្រារព្ធ ហើយបើពិនិត្យ​ដោយ​សង្ខេប​​គេឃើញ​មានកិច្ច​ចំនួនបីប៉ុណ្ណោះ ​ដែល​មាន​​​​​វត្ត​មាន​ព្រះសង្ឃ ​ពោល​គឺ​ក្នុងកិច្ចសូត្រ​មន្ត​នៅ​ព្រលប់ថ្ងៃទី១ និង​កិច្ចផ្តាច់ជុក រួច​រាប់​​បាត្រ​ព្រះសង្ឃ​នៅ​ព្រឹក​​ថ្ងៃ​បង្ហើយ។ រីឯ​កិច្ចដទៃ​ទៀត​​​គឺមាន​តែអាចារ្យ និង​ចាស់ទុំ​ដែល​​ចេះ​ច្បាប់​ក្បួន​​ជាអ្នក​រៀបចំ​ ដ្បិតមាន​​កិច្ចខ្លះ​ពិបាក​នឹង​យល់​ន័យ​អស់ផង​។ កិច្ច​ទាំង​នោះ​​រួមមាន​ ប្រុង​ពលី (ឬ​ក្រុង​​​ពាលី) សែន​មារការ សែនដូនតា បង្វិលពពិលអង្ករ​រាប ដេក​អង្ករ​រាប ហៅ​ព្រលឹង​សក់ ជញ្ជាត់​ព្រលឹង រាវអង្ករ​រាប ធ្វើធ្មេញ ។ល។​

ពាក់ព័ន្ធ​នឹង​ពិធីកោរជុកនេះ អ្នកស្រាវជ្រាវ​បាន​រកឃើញ​ន័យ​ផ្សេងៗ​គ្នា។​ ពាក្យថា “ជុក” គឺនិយាយតាមពាក្យថាជាទូទៅ ឯអ្នកស្រុក​នៅ​តំបន់ខាងជើង និងភាគពាយព្យ ប្រទេស​​​​ច្រើនហៅថា “កំប៉ោយ” ឬ “កំប៉ោច” ហើយ​បើគេចង់និយាយ​ពីកិច្ចពិធី​កាត់​កំប៉ោច​​ជា​ស្ថាពរនោះ គេច្រើននិយាយសាមញ្ញថា “កោរ​សក់”។ រីឯអ្នកស្រុកខ្លះថា “កោរ​សក់” ឬ “កោរកំប៉ោយ” ហើយ “ជុក”​ ឬ “កំប៉ោយ​” ជា​សក់​មួយ​ដុំ ឬច្រើន​ដុំ​ (អស់​ច្រើន​​៣ដុំ) ដែល​ក្មេង​ប្រុសស្រី​​ទុក​នៅលើក្បាល​ចាប់​ពី​​អាយុ​​៣ឆ្នាំ រហូត​ដល់ធំ​ឡើង​ទើប​​​​កោរ​​​។​ ប៉ុន្តែ​យ៉ាង​ណា​​​ក៏ដោយគេមើលឃើញ​ដូច​គ្នា​ថា “កោរជុក” ជាពិធី​​​​រៀបចំ​សម្រាប់​ក្មេង​ទាំង​ស្រី​ទាំង​ប្រុស​​​មុនពួកគេឈាន​ដល់​ដំណាក់​កាល​ពេញ​វ័យ ដែល​គេនឹង​ត្រូវ​ឆ្លងកាត់​កិច្ចពិធីផ្សេងៗ​ជាច្រើន​តទៅទៀត។

ដោយឡែក “កិច្ច​ហៅព្រលឹងសក់” គឺជាកិច្ចមួយដែលប្រារព្ធក្នុង​ពិធីកោរជុក​នា​វេលា​​អាធ្រាត្រ បន្ទាប់​ពីកិច្ច​ដេក​អង្ករ​រាប។ មកដល់ត្រង់នេះគេគួរយល់​ដែរថា ​ក្នុងជំនឿ​ខ្មែរ “ព្រលឹង” ពិបាក​​​​​នឹង​ពន្យល់ថា​ជា​អ្វី​ឱ្យ​ប្រាកដ​ណាស់ តែ​ខ្មែរ​យល់ដូច​គ្នាថា​មនុស្ស​ម្នាក់ៗ​​មានព្រលឹង​ចំនួន​១៩ ហើយបើព្រលឹង​រលោះ​ពីខ្លួន (ហៅថា​លោះ​ព្រលឹង​) នោះ​ម្ចាស់​​ខ្លួន​នឹង​ពុំ​មាន​សុខភាព​រឹង​មាំឡើយ។ រីឯ​ “សក់” វិញសោត ខ្មែរ​យល់​ថា​មាន​ន័យ​​​វែង​ឆ្ងាយ​​ខ្លាំង​ណាស់ ដ្បិត​គេ​តែង​សង្កេត​ឃើញ​​មនុស្ស​ខ្លះ​កាត់​ឱ្យ​ខ្លី (មិនមែន​កាត់​​ឱ្យ​​ស្អាត​ស្អំ​ក្នុង​​ទស្សនៈ​សោភណភាព) មនុស្ស​ខ្លះ​​កោរ ឯមនុស្ស​​ខ្លះ​ទុកសក់​​ឱ្យ​វែង​ពុំ​ហ៊ាន​​ប៉ះ​ពាល់​​ឡើយ ហើយខ្មែរ​ក៏​តែង​មាន​កិច្ច​តាម​ទំនៀម​ជាច្រើន​ពាក់ព័ន្ធនឹង​សក់ តាំង​ពី​កើត​មក​ជា​ទារក​ជាហូរហែមកដែរ។

ចំពោះកិច្ចហៅព្រលឹង​សក់នេះ គេធ្វើពេល​ក្មេង​​ដេក ហើយ​អាចារ្យ​​តែង​នាំគ្នាសូត្រ​​ ​មាន​​បែប​បទលើក​ដាក់​សំឡេងយឺតៗ​ និង​មាន​អ្នក​ចាំ​បន្ទរ​ត្រង់​ឃ្លាមាន​ពាក្យ​ថា​ “ព្រលឹង”។​​ឃ្លា​បន្ទរ​​មានជាអាទិ៍ “មក​វើយ ​ព្រលឹង​សក់! មើល​កុក មើល​ទុង​ មើល​ជ្រុង​​ទន្លេ កុំទៅតាម​គេ​ មក​ផ្ទះ​យើង​វិញ” ឬបន្ថែមថា “នៅ​ផ្ទះ​​យើង​ធំ​ស្រណុក ស៊ី​ចេក​អំបុក ស៊ីត្រាវដំឡូង ស៊ីចេក​ដេក​នៅ ស៊ី​អំពៅដើរលេង គេហៅ​កុំដោយ រមិល​​មើល​ក្រោយ រក្សា​រូប​រក្សា​អង្គ” ជាដើម។ ឃ្លាបន្ទរ ហាក់​មាន​ន័យ​បារម្ភ​ខ្លាច​ព្រលឹង​​រលោះ​​ចេញ​ពីក្មេង​ មិន​នៅរក្សា​រូប​កាយ​ក្មេងទាំងនោះ។ ការ​សូត្រ​ហៅ​ព្រលឹង​នេះចាយ​ពេល​ប្រហែល​ជាង​១ម៉ោង តែ​បើ​អាន​ធម្មតាប្រហែល​ជាង​១០នាទី​ប៉ុណ្ណោះ។ រីឯរណ្តាប់​​​សំខាន់​ក្នុង​​កិច្ច​នេះគឺ បាយ​ព្រលឹង និង​បាយសីដើម ហើយ​ក្រោយ​បញ្ចប់​ពាក្យ​សូត្រ​​ គេ​​​​តែងដាស់​ក្មេង​​​ឱ្យ​ងើប​ពីដេក និងយក​បាយ​ព្រលឹង​នោះ​​បញ្ចុក​គ្រប់ៗគ្នា ​​មានដូចជា​ កំណាត់​អំពៅ ចេកទុំ ដំឡូង​ ត្រាវ និងពំនូត​បាយ​ជា​ដើម។ បាយព្រលឹង​នេះ រៀបចំឡើង​ដើម្បី​សម្តែង​​ឱ្យ​ឃើញ​ថា​​ព្រលឹង​​​​ទាំង​អម្បាល​​​ម៉ាន​​នៅមូល​ជុំគ្នា ទន្ទឹម​នឹង​ពេលចប់កិច្ចគេ​តែង​​ស្រាយ​បាសី​ដើម រួចលើករំលង​ក្មេង​៣​ដង ទើបយកទៅចោល ដ្បិត​ជានិមិត្ត​រូប​ថាអាត្មា​ចាស់​នៃក្មេង​ម្នាក់ៗ​​កន្លងហួស​ហើយ៕


————————————————————————

Calling hair soul in the cutting of the Top-Knot ceremony


There is a lot of rites to be done in the cutting of the Top-Knot ceremony. These rites include Krong Pali, sacrificing the ancestor, the passing of the Popil, Daek Angkaw Reap, calling the hair soul, finding Trol in Angkaw Reap, making teeth. Regarding the cutting of the Top-Knot ceremony, researchers have found different meanings. The word “Chuk” is a common word, and the people in the north and northwest of the country often call it “Kampoy” or “Kampoch” and if they want to talk about the ceremony of cutting the Kampoch, they often say simply “shave hair.” Some locals call it “shave hair” or “shave Kampoch” and “Chuk” or “Kampoy” as one or more pieces of hair (more than three pieces) that boys and girls keep on their heads from the age of three years old and their hair will be shaved when they are adult. However, it is also seen that “the cutting of the Top-Knot” is a ceremony for children, both boys and girls, before they reach adulthood, they will have to go through many other rites.


In particular, the “calling the hair soul” is a rite that is celebrated in the cutting of the Top-Knot ceremony at midnight after the sleep on Angkaw Reap. At this point, it should be understood that in the Khmer belief, “soul or Pralung” is difficult to explain for sure, but Cambodians agree that each person has 19 souls and if the soul is lost from the body (called lose soul or Loh Pralung) that is the owner of the body will not be healthy. As for “hair”, Khmer people understand that it is deep meaning because it is often observed that some people cut hair short (not for good looking), some people shave and some people keep their hair long and do not dare to touch it. And Khmer also has a lot of traditional rites related to hair from birth as a baby.
As for the call for the hair soul, it is done when the boys or girls are asleep, and the Acha always prays in a slow manner and there are people who chorus the phrase “Pralung”. The chorus phrases include, “Come on, hairy soul! Look at Kok, look at Tung, look at the corner of the river, do not follow them back to our house”. The chorus seems to mean the fear of the souls lost from the children not keeping their bodies. This recitation of the soul takes about an hour, but a normal reading takes about 10 minutes. As for the main ritual object in this rite, it is the Bai Pralung and Baisei Daem (the large Baisei), and after the end of the chanting, they always wake the children up and eat Bai Pralung. This meal is designed to show that all souls are together and at the end of the day, they always untie the Baisei Daem then lift it over the child three times and take it away, as a symbol of children’s old bodies has gone.

អត្ថបទដើម៖ កញ្ញា ហៀង សុវណ្ណមរកត

- Advertisement -spot_img

អត្ថបទជាប់ទាក់ទង

អត្ថបទផ្សេងទៀត

- Advertisement -spot_img

បណ្ដាញសង្គម

13,131FansLike
183,600FollowersFollow
7,120SubscribersSubscribe
- Advertisement -spot_img
error: Content is protected !!