ទំព័រដើមទំនៀមទម្លាប់បុរាណជំនឿជំនឿ និងការ​គោរពប្រតិបត្តិអ្នកតាព្រះចៅនៅវត្តភ្នំ

ជំនឿ និងការ​គោរពប្រតិបត្តិអ្នកតាព្រះចៅនៅវត្តភ្នំ

ជាទូទៅអ្នកក្រុងភ្នំពេញ ឬជាពិសេសអ្នក​ជាប់សែស្រឡាយចិន ភាគ​​ច្រើន​ស្គាល់​អ្នកតា​ព្រះ​ចៅ​​ឥត​សង្ស័យ​​ឡើយ។ ​តាម​សម្គាល់គេ​​តែង​​​នាំគ្នា​ចូល​​ទៅ​គោរព​ប្រតិបត្តិ​អ្នកតា​​នេះ​យ៉ាង​ពពាក់​ពពូន​នៅ​ក្នុងរវាង​មុនថ្ងៃ​ចូលឆ្នាំ​ចិន ​​ដើម្បី​​សុំ​លាភ​សុំជ័យ​ឆ្នាំថ្មី​សំណាង​ល្អ និង​កាត់​គ្រោះ​​​(កាត់ឆុង​)រំដោះ​​​​ចង្រៃទៅតាមជំនឿ និង​ទំនៀម​ដែល​វិវឌ្ឍ​តមក​ជាធម្មតា។ រីឯនៅ​ថ្ងៃ​ធម្មតាហួស​ពីនោះ​​​មក ​គេ​ក៏​សង្កេត​​​​ឃើញថា​​មាន​​អ្នក​ចូល​​ទៅ​អុជ​ធូប​​បូជា​​បន់ស្រន់​បួងសួង​ អាស្រ័យ​​តាម​កង្វល់​ផ្ទាល់​ខ្លួន​នៅ​អាស្រម​អ្នក​តា​ព្រះចៅ​ហូរ​​ហែ​​​​ពុំសូវ​​លុះពេលដែរ។ អ្នកតាព្រះចៅ ឬលោកតា​ព្រះចៅ មាន​អាស្រម​ស្ថិត​នៅ​​ជ្រុងខាង​ជើង​ព្រះវិហារ​នៃ​រមណីយ​ដ្ឋាន​ប្រវត្តិសាស្រ្ត​វត្ត​ភ្នំ កណ្តាល​រាជធានីភ្នំពេញ។ បើផ្អែក​តាមរឿង​​ព្រេង​និទាន​តំណាល​​​តមកថា អ្នកតា​នេះ​កកើត​ឡើង​ស្រករនឹង​កំណើតរាជធានីភ្នំពេញ។ តាមរូបថត​​ឯកសារ​បង្ហាញ​ថា​ កាលពី​ដំបូង​​​ឡើយអាស្រម​អ្នក​តា​ព្រះចៅ ក​សាងឡើង​អំពីថ្ម​តូច​មួយ​ប៉ុណ្ណោះ។ ប៉ុន្តែក្រោយមកទៀតពុំអាចកំណត់ឆ្នាំឱ្យជាក់លាក់ចំពោះការវិវឌ្ឍន៍របស់អាស្រមដែល​បាន​​រៀបចំ​កាន់​តែធំ​ជាង​មុនដូច​ឃើញសព្វថ្ងៃ ហើយ​​ដាក់តម្កល់​រូប​សំណាក​ផ្សេងៗ​​អម​មួយ​ចំនួន​ទៀត​ដូចជា​ យាយ​ទេព តា​ឥសី ​តោ​ និង​​ខ្លា​ខាងមុខ​អាស្រម។

អាស្រម​ចាស់​អ្នកតា​ព្រះចៅ (ប្រភព៖ EFEO)

ពាក់​ព័ន្ធនឹង​កំណើត​អ្នកតាព្រះចៅ គេបាន​តំណាល​​ថា​ មាន​​ដូនចាស់ម្នាក់ឈ្មោះ “ពេញ” បានប្រទះឃើញ​ព្រះពុទ្ធរូបមុខ៤ (ឯកសារ​​ខ្លះថា​ព្រះពុទ្ធ៤​អង្គ) និងបដិមាថ្ម​មួយ​​​ក្នុង​​ប្រហោង​ដើមគគីរ​អណ្តែត​តាម​ខ្សែ​ទឹក​ទន្លេ​ធំ។ បដិមាថ្មនោះ​ មាន​ដៃម្ខាងកាន់ដំបង និង​​ម្ខាងទៀត​កាន់​ស័ង្ខ ដែល​គេ​យល់​ថា​ជា​បដិមាតួ​អង្គ​​ព្រះ​នារាយណ៍។ ក្នុងគ្រា​នោះគេ​បាន​ដង្ហែ​​ព្រះពុទ្ធបដិមាយកទៅតម្កល់​ក្នុង​ព្រះវិហារលើ​កូនភ្នំ ចំណែក​​​បដិមា​ថ្ម​ខាង​លើ គេ​​បាន​រៀបចំ​តម្កល់​គោរព​បូជា​នៅចង្កេះភ្នំ ដោយ​សន្មត​​នាម ​​“អ្នក​តា​ព្រះចៅ”។ មក​ដល់​ក្នុង​​​​រវាងដើម​សតវត្សទី២០ គេមើលឃើញថា​អាស្រម​អ្នកតា​ព្រះចៅមាន​​លំនាំ​ជា​បុស្បុក​លាត​​សាមញ្ញ​ លម្អដោយ​​ផ្តែរ និងសសរពេជ្រ​​រចនាបថ​សំបូរ​ព្រៃគុក និង​មាន​​​ទ្វារ​បាល​​​ឈរ​​​​កាន់ដំបងសងខាងទ្វារចូល។

នៅរវាងដើមទសវត្សទី៧០ មានការ​សិក្សា​ពិចារណាមួយ​អំពីការគោរព​បូជា​អ្នកតា​ព្រះចៅ។ គេ​សង្កេត​ឃើញ​ថា​អ្នកតា​ព្រះចៅ​ជាអមនុស្ស ​ដែល​មាន​នាទីធំ​ក្នុង​ការ​កាត់​ក្តី​​ផង ជួយព្យាបាល​ជំងឺផង និង​ជាអ្នកគ្រប់គ្រងក្នុងតំបន់នោះផង។ ក្នុង​គ្រានោះគេ​តម្កល់​រូប​សំណាក​អ្នកតា​ព្រះចៅ​កណ្តាល ភរិយា​នៅខាងឆ្វេង និង​កូននៅខាង​ស្តាំ ហើយ​គេ​យល់​​ថា​បដិមា​ទាំងនេះ​ មានលំនាំ​ដូចសិល្បៈ​លាវផង។ អ្នកមានជំនឿ តែង​​ចូល​ទៅ​ពឹង​ពរ​​ក្នុង​កង្វល់​ផ្សេងៗគ្នាដូចជា សុំ​ឱ្យ​រកស៊ីមានបាន សុំ​ឱ្យ​ជាសះពីជំងឺ សុំ​​ឈ្នះ​ល្បែង​ សុំឱ្យ​រកឃើញរបស់ សុំឱ្យ​ឈ្នះក្តីលែងលះ និង​សុំ​ឱ្យ​ការលក់ដូរ​របស់ទ្រព្យ​បាន​សម្រេច​។ល។ នៅ​ពេល​ដែលសេចក្តីបំណងបានសម្រេច ​គេ​តែង​ថ្វាយ​ក្បាលជ្រូក មាន់​ស្ងោរ (ឬមាន់​រស់) ផ្កាភ្ញី នំចំណី ផ្លែឈើ ទឹកអប់ ក្រណាត់ គ្រឿង​អលង្ការមាសប្រាក់(ស្ពាន់) និង​​វត្ថុ​ឧបកិច្ច​​ដូចជា​យន្តហោះជាដើម។ ផ្ទុយ​ទៅវិញ ​ប្រសិនបើ​គេ​បំភ្លេចមិននឹកនា នោះ​ គេ​​នឹង​ធ្លាក់ខ្លួនឈឺ រហូតដល់ស្លាប់ក៏មាន ឬជាពិសេសបណ្តាលឱ្យ​យល់សប្តិឃើញ​ក្របី។ ប្រការត្រង់នេះ គួរនឹងយើង​ពិចារណាបានដល់រឿងសេចក្តីស្លាប់ ដ្បិតក្នុងជំនឿដើមក្របី​ជាជំនិះ​របស់ព្រះយម ដែលជាទេពនៃសេចក្តីស្លាប់។

បច្ចុប្បន្ន គេ​ឃើញ​រូប​សំណាក​​អ្នកតា​​ព្រះចៅ​ដាក់​តម្កល់នៅកណ្តាល ​អម​ដោយ​​​បដិមា​ភេទស្រីតូចមួយនៅ​​​ខាង​ឆ្វេង​ និង​បដិមា​ភេទប្រុស​មួយទៀត​នៅខាង​ស្តាំ​ដដែល។​​​​​អ្នក​តា​ព្រះចៅ ​​អង្គុយ​ក្នុង​ឥរិយា​បថ​បញ្ឈរ​ជង្គង់ ដៃស្តាំដាក់លើ​ជង្គង់ ដៃឆ្វេង​កាន់មោង​(?) មុខ​មាំ ច្រមុះធំ ចិញ្ចើម​ក្រាស់ ភ្នែកធំ សក់​លំនាំ​​ម៉ូត​ស្លាបចាប។​ ចំណែក​នៅខាង​មុខ​អាស្រម​​មាន​ទ្វារបាល និង​ក្បាច់​លម្អ​លំនាំ​ចាស់​ដដែល តែលាបពណ៌ថ្មី (រូបលេខ​៦)។ ដូច្នេះ​​តាម​រយៈ​ភស្តុ​តាង​​ខាងលើ គេ​ឃើញថា​រូបសំណាក​អ្នកតា​ព្រះ​​ចៅនៅតែ​​ដាក់​​តម្កល់​ក្នុង​​បុស្បុក​​​ដើម តែពុំមែនជារូប​​មាន​លក្ខណៈ​​ដូច​ទៅ​នឹង​សេចក្តី​ពណ៌នា​​​ក្នុង​រឿងព្រេង​​។ ចម្ងល់នេះចាស់ទុំ​ខ្លះពន្យល់ថា បដិមាដើម​ត្រូវ​គេយក​ទៅតម្កល់​ក្នុង​ចេតិយ​ធំ (ចេតិយ​បព៌ត)​ ខាងក្រោយ​វិហារវិញ។

អាស្រមអ្នកតា​ព្រះចៅសព្វថ្ងៃមើលពីក្រោយ

នៅក្នុងរវាងឆ្នាំ​២០០៩ អាស្រម​អ្នកតា​ព្រះចៅ​បាន​រៀបចំ​ពង្រីក​ធំជាង​មុន ​ទៅតាម​​​កម្លាំង​​​​សទ្ធារបស់​សប្បុរសជននានា។ ប្រហែល​ចាប់ពីពេលនេះហើយដែល​គេបានរៀបចំអាសនៈ​ និង​រូប​​សំណាក​​ផ្សេងៗ​បន្ថែម​​​​ទៀតដូចជា អាស្រម​យាយ​​ទេពស្ថិត​នៅខាងស្តាំដៃ មុខផ្លូវ​ចូល​​ទៅ​អាស្រម​​​អ្នក​តា​ព្រះ​ចៅ ក្បែររានទេវតា ពោលគឺក្បែរ​នឹង​ឡ​ដុត​ក្រដាសសែន។ រីឯ​អាសនៈ​​​តាឥសី ស្ថិត​នៅក្រោម​​ដំបូល​អាស្រម​​អ្នកតា​ព្រះចៅ ត្រង់ចំហៀង​ខាង​​ស្តាំដៃ។ ចំពោះ​រូប​សំណាក​​​តោ​ថ្មទាំង​ពីរ និង​រូបខ្លាស ស្ថិត​នៅក្បែរ​នឹង​អាសនៈ​តាសី។

​អាសនៈ​​​តាឥសី

ដោយ​ឡែក​ចំពោះគ្រឿង​ដង្វាយបច្ចុប្បន្ន​ ដែល​គេ​តែង​នាំចូល​ទៅគោរពបូជា​រួម​មាន​​ ផ្កា​ឈូក ផ្លែឈើ នំ ចំណី ក្រដាស​សែន និង​ទៀនធូប។ ប៉ុន្តែ​ដង្វាយ​ពិសេស​តាម​ជំនឿ​សព្វថ្ងៃ​ដែលគេ​ពុំ​ដែល​ភ្លេច​ គឺសាច់ជ្រូក​បីជាន់ ពងទាឆៅ និង​មឹក​ក្រៀម (យៀវហ៊ឺ)។ គ្រឿង​ដង្វាយ​​​ទាំងអស់នោះ គេត្រូវ​រៀបជា​ចំណែកក្នុង​ចាន​ សម្រាប់​​ដាក់បូជា​នៅ​កន្លែង​ផ្សេងៗ​គ្នាទៅតាម​អាចារ្យ​បង្គាប់រៀបចំតាមក្បួនខ្នាត​។

ដង្វាយ​ពិសេស​តាម​ជំនឿ​សព្វថ្ងៃ​

ជាធម្មតា នៅពេលចូលទៅដល់បរិវេណ​អាស្រម​អ្នកតាព្រះចៅ គេត្រូវ​ចូល​ទៅ​អុជ​ធូប​សំពះទេវតា​ជាមុន រួច​ទើប​ចូល​ទៅ​​ដាក់ដង្វាយ​ផ្លែឈើ នំចំណីផ្សេងៗ​នៅ​លើ​តុ​​​ថ្វាយ​ចំពោះ​អ្នក​តា​ព្រះចៅ។ បន្ទាប់មក​​​ គេត្រូវចូលទៅឱ្យ​លោក​អាចារ្យ​ធ្វើកិច្ចកាត់គ្រោះ និង​យក​សាច់​ជ្រូក ពងទា និង​មឹកក្រៀម​ថ្វាយរូបសំណាកតោ និង​ខ្លា​​ស។ កិច្ច​នៅ​ត្រង់​នេះ គេត្រូវ​យក​ក្រដាសសែន​ដុត រួចហើយទើប​គេ​​​យក​សាច់​ជ្រូក​ទៅ​ដាក់ចូល​មាត់​តោ និង​ខ្លា ព្រមទាំង​យក​ពងទាទៅ​​គោះ​បំបែក​ក្នុង​មាត់​តោ និងខ្លាផងដែរ។ ចំពោះ​​មឹកក្រៀម គេអាច​ដាក់​ថ្វាយ​នៅលើ​ក្បាល​តោ ឬក្បាល​ខ្លាក៏បាន។ កិច្ច​​នៅ​ត្រង់​នេះ ក្រៅ​ពីកាត់គ្រោះ (កាត់​ឆុង) គេ​ជឿថា​​តោ និង​ខ្លា​ទាំង​នោះ​នឹង​ជួយ​បណ្តេញ​ឧបទ្រព​ចង្រៃ​ផ្សេងៗ នាំមក​នូវ​សិរីសួស្តី​​​ឆ្នាំថ្មី​ផង។ ចុង​បញ្ចប់​ ទើប​ចូល​ទៅ​អុជ​ធូប​តាឥសី​ និង​យាយទេព។

សរុបមក ជំនឿ និងការ​គោរពប្រតិបត្តិ​អ្នកតា​ព្រះចៅ គឺជា​ជំនឿ​ជីវចល​ដែល​​ទទួល​ឥទ្ធិពល​ប្រពៃណី ទំនៀម​ទម្លាប់​ចិនបន្ថែម​លើជំនឿ​ដូនតា។ ឥទ្ធិពល​នៃជំនឿ​ និងសាសនា​ គឺ​តែង​វិវឌ្ឍ​ជា​ធម្មតា​ ដូចដែល​ដើមឡើយ​ខ្មែរ​ទទួល​ឥទ្ធិពល​ជំនឿ និងសាសនា​ឥណ្ឌា​ គោរ​ពប្រតិបត្តិរួមគ្នា​ជាមួយ​ជំនឿ​ដូនតារបស់​ខ្លួន​ជាដើម​។ សូមកុំភ្លេចថាភូមិសាស្រ្ត​តំបន់​នេះ​ ដើមឡើយ​ជា​ព្រែក និង​ជាអតីត​សហគមន៍ចិន​​រស់​នៅរកស៊ីដំដែក រហូត​ជាប់​ឈ្មោះ​វត្ត​ចិនដំដែកនៅ​ខាងជើង​វត្ត​ភ្នំស្រាប់។ រីឯចម្ងល់​ដែល​តែង​ចោទឡើង​ចំពោះ​រូបសំណាក​អ្នកតា​ព្រះចៅ​​ដូច​សេចក្តីពិពណ៌នា​ក្នុងព្រេង​និទាន​នោះ ពុំ​ទាន់​មាន​ការ​សិក្សា​ស្រាវជ្រាវ​ស៊ីជម្រៅ​​ណា​បកស្រាយ​បាននៅឡើយ។ ប៉ុន្តែ​រូបសំណាកអ្នកតា​ព្រះចៅដែល​​ឃើញ​មកសព្វថ្ងៃនេះ គឺ​​​ខ្មែរ​គោរព​បូជា​តាំងពីបុរាណ ដោយគ្រាន់តែ​ជួស​ជុល​ និងលាបពណ៌ថែមថយ​ខ្លះ​ប៉ុណ្ណោះ ដ្បិត​លម្លៀក​បំពាក់ ឬសក់នៅ​មាន​លក្ខណៈ​ជាខ្មែរ​នៅឡើយ៕

អត្ថបទដើម៖ ហៀន សុវណ្ណមរកត

- Advertisement -spot_img

អត្ថបទជាប់ទាក់ទង

អត្ថបទផ្សេងទៀត

- Advertisement -spot_img

បណ្ដាញសង្គម

18,489FansLike
191,100FollowersFollow
10,600SubscribersSubscribe
- Advertisement -spot_img
error: Content is protected !!